U Komisyon Amerikoyo dcali Hirutho Emwothoyto da Tawdiyotho frısle u taşrorayde d’cali hirutho tawdithoyto bu Iraq

U Komisyon Amerikoyo dcali Hirutho Emwothoyto da Tawdiyotho, frısle u taşrorayde di şato cali aykanoyutho dkito bu haqlo di hirutho tawdithoyto bı athrawotho frişe dıbritho. Bu taşrorano dıfriş duktho cali aykanoyutho di hirutho tawdithoyto bu Iraq, kmıgrışste u zuhoro cali sbutho du camaydan, da Ezidoye uda qalilotho tawdithoye hrene.

U Komisyon Amerikoyo dcali Hirutho Emwothoyto da Tawdiyotho dkıtyo masro bi wazirutho di baroyutho d’Amerika, bşıkıl rwiho kıgorış u zuhoro bu taşrorayde da 2020, cala dyoşe dkowe cali aykanoyutho di hirutho tawdithoyto dıba casrowat d’athrawotho frişe dıbritho. Bebzabno bu taşroranoste kito lohitho dilonoyto dıkmicaqbi eba anathrawotho dıkdayşi i hirutho tawdithoyto; beynothaye u Iraq.

Bu fosuqo dcalu Iraq, u Komisyon, bi qamayto mahkele cali aykanoyutho du Iraq, calu qrobo mqabıl d’Dacış, cali siyase du athro, cala came etnikoye tawdithoye frişe dıkhoye bu athro uğer sebwotho. U Komisyon Amerikoyo kımawdıc di wazirutho di baroyutho d’Amerikaste kımdawmo u hbosayda cali şultonutho d’Boğdod dımbayno siyase mqabıl da hayle folhoye dıkmaşın cnufyo u dıkmaklın a fulhone du snodo udu tedciro da qalilotho etnikoye-Ezidoye u Mşihoye la dukothathe a şerşoye.

Bu taşrorano kmıtlıb mi şultonutho dmahto tedbire casye cala haylani dıkmısnodi mu İran u dmahto u quyomo da qalilothani bi qadmoyutho da fulhonayda b’nişo dhowelın mathlonutho ba şutose frişe du athro leşan dıqudri dımhafdi cali mşaynutho ucala yuthronathe, dilonoyith bi daşto d’Ninve. U Komisyon mawdacle ba 2019 mcadlowa ışmo i hirutho tawdithoyto bhın dukotho bu Iraq, elo bi daşto d’Ninve ubı Şigor, heş kıloqın a qalilothani qetre jıddi dı qudri ducri bı mşaynutho la dukothathe.

Mawdıc, walaw mqadım mcadronutho me Amerika u ğer athrawotho leşan tarmiyotho du bnoyo u hethotho da dukotho da qalilothani, elo heş kito ba casro alfayo dıbnaynoşo bu qento. I sagiyutho da Mşihoye du Iraq heş galwoyene u kızayci ducri la dukothathe. A hayle folhoye, xıd Haşd al Şacbi, a Şabak wa hayle d’Babylon dıkmısnodi mu İran, kımaşın rdufye mqabıl da Mşihoye udu dcorathe l’Barıtle, Bağdede uğer qıryawotho di daşto u mahıtwolın mnoco cala Mşihoye dnufqi ma botathe bu cedo d’Ashura.

Cala qedomaniste i wazirutho di xazina d’Amerika mahıtwola tedbire cala rişone Waad Qado u Rayan al Keldani. Bu taşrorano mawdıc dbeyn 64-69 ba mo Şica Maşılmone’ne, 29-34 Sunna’ne wu me milyon u falge d’Mşihoye ba 2003 kito adyawma hol 200 alfo Mşihoye-Qatholiqoye, Orthodoksoye u Protestanoye bu Iraq. 700 alfo Ezidoye. Ba 2019, beyn 30-50 ba mo da Kaldoye Othuroye uğer Mşihoye daciriwo la dukothathe bıthır mi golutho umu nfolo d’Dacış ba 2017 u aydarbo mahıt ido calu mal u mulk da Mşihoye. Bebzabno friş duktho rwıhto bu taşrorano cali aykanoyutho da Ezidoye d’Şigor.