06/08/2020

U Komisyon du Mawtbo d’Urifi frısle taşroro cali aykanoyutho da hbişoye b’Turkiya

 U Komisyon du Mawtbo d’Urifi mqabıl da taşniqe, frısle tıre taşrore calu qedomo di şultonutho d’Turkiya la hbişoye.

 A taşrorani frisi, cali netije da buhone dsımle u Komisyon cala socurwotho dsımle l’Turkiya ba 2017 u ba 2019.

U Komisyon du Mawtbo d’Urifi dıkfolıh leşan dmakle a taşniqe wu qedomo lo noşoyo dıkmisım cala yasire u cala hbişoye, frısle athmıl 2 taşrore cali netije da buhone dsımle bu zabno da socurwothayde l’Turkiya ba 2017 uba 2019.

Bu taşrorano mawdıc, du nişo rişoyo da 2 socurwothani dsimi, dımtahqıb u qedomo wi aykanoyutho dkito ba hbuşye uda farsufe dımsiki mu polis u mi jandarma d’Turkiya’we. Leşan a buhonaniste, u Komisyon sımle maqıblonwotho cam ba mowat dfarsufe b’Ankara, b’Omid u Stanbul marfın mu polis ma thome di marhıbonutho u ğer hawbe.

U Komisyon sımleste socurwotho l’mınyono dı hbuşye dkıtwın malye b’Stanbul u bu tayman madınho d’Turkiya. Elo bi socurutho dsimowa ba 2017, grışwo dilonoyith u zuhoro du Komisyonano cali aykanoyutho da hbişoye d’Stanbul u dı İzmir, dkıtwolın kewe jıddi wu qetre frişe du hulmono udlo mcalji. Mqafeste hbişoye nuxroye; beynothaye farsufe dkıtwın bu cumro nacimo uba yarhe fayışi msike b’Stanbul u bı İzmir.

Bu taşroro da 2019’ste, i taşdarto du Komisyonano sımwola socurutho lu hbuşyo d’İmralı leşan dhuzyo i aykanoyutho da hbişoye kulle wu qedomo da mşale u noture la zedqathe; xıd mathlo dmitahwelın aftho dloqın u ahılathe wa sniğrathe. Bi sbuthatheste, griş dilonoyith u zuhoro calu rişono Kurdoyo Abdullah Öcalan dıkmıhrım ma zedqayde.