U leşono Suryoyo bu qento du mowtoyo

U leşono Suryoyo wa leşone da came frişe dkıtne b’Turkiya jğer mu Turkoyo bu qento du mawtone, komır u qentrun du buhono Sosyo politik dkıtyo b’Turkiya.

Me gabo hreno i karxutho d’Omid mabdela fulhono laşan dobo yulfono ba leşonani dkıtne bu qento du mawto.

Bu buhono dsımle u qentrun du buhono d’Sosyo-politik d’Turkiya mawdacle da leşono da came dıkhoyın b’Turkiya kfayti b’maşıqlo ğalabe casqo, dkibınn dmivayci mu kenşo. İ mlahmonitho du şutosano Yuksel Genc bi maqırhonutho dhula lu tbocofroso mırla; A leşono dlatne Turkoye, kmisım siyase du fşoro aclaye u calathe matın ucdo l’qento dmivayci u dlowe noşo d’mamlıl ebaye.

Bi maqırhonuthayda Genc mırla: Ba buhone dsımlan b’40 karxwotho d’Turkiya cala leşone dıkmitajğıli b’Turkiya-dkıtne u leşono Suryoyo, Kurdoyo, Armnoyo, Lazoyo, Çarkozoyo wa leşone hrene, kmahwe dıkfayti b’maşıqlo casqo. Cıl mi şiyase d’Turkiya dkıtyo hdo otho-ha camo-hdo tawditho, kito came frişe bu athro dkıtlın leşono mşahılfe elo a leşonani lıkmitahwelın iqoro u bebzabno kull naqla kito siyase du fşoro aclaye mawxa’ste-en dlo misım mede la leşonani kibin dmivayci u dlo foyış camo dıkmalıl ebaye-dilonoyith u Suryoyo Lazoyo Çarkazoyo u ğer.

Genc kobo u renyeyda calu teqwiyo da leşonani dkıtne bu qento du mawto u kımmo; Klozım dmitahwe yuqro la came dmalili u leşonathe u bebzabno i şultonutho dmahto yuqro calu tewlifathe. Me gabo hreno i karxutho rabtho d’Omid mabdela fulhono, du ftoho d’dawrat bu leşono Suryoyo, Kurdoyo, Fırsoyo, Caraboyo leşan dtorın a leşonani cali rağlo. Bi sbuthathe i hugtho di karxutho da mardwotho mşarela b’buhone cala malfone wa mkone du tewlifo da leşonani da came. A dawrani kmintır dımşarın bu yarho dothe dmitaqrın bu taro di karxutho rabtho d’Omid.