15/12/2020

U malolo ruşmoyo du Mawtbo Umthoyo d’Bethnahrin krıhle i maqırhonutho du rejim d’Suriya

U malolo ruşmoyo du Mawtbo Umthoyo d’Bethnahrin-MUB Hanibal Yacqub, krıhle i maqırhonutho du rejim d’Suriya u du wazirayde da waqfat, cal dıkmathlo hjomo qriho calu camo Suryoyo şerşoyo u cali hiyoyuthayde i umthoyto wa zedqe ruşmoye dkıtle b’Suriya.

Yacqub bi maqırhonutho dhule l’Suroyo TV sımle qroyto lan abne du camaydan du athro u di golutho, dmahwın kleyto mqabıl du rejim d’Suriya dlıkobıc u camaydan dmoyıd duktho bu maşıqlo folitiqoyo hatho d’Suriya.

 U camo Suryoyo wa gabe u şutosayde dkıtne bu athro u bi golutho, kımdawmi dmahwın hfuxyo qaşyo mqabıl di maqırhonutho dhuwole u rişathro d’Suriya Başar Al Asad wu wazirayde da waqfat dmankarwolın i ithutho umthoyto şerşoyto du camaydan u Suryoyo d’mene athi u ışmo d’Suriya, u dhuweyo u banoyo di mdinoyutho makthabzabnoyto d’Suriya dkıtyo falqo mi mdinoyutho d’Bethnahrin.

Bu taro da hfuxyani, u malolo ruşmoyo du Mawtbo Umthoyo d’Bethnahrin-MUB Hanibal Yacqub mırle; U rejim du Bacıth hani zabno d’5 ışne kımdawım i siyasayde dıkmankıro a zedqe du camo Suryoyo u dıklıhyo i hiyoyuthayde i umthoyto. Bebzabno, u rejim lo mvayacle u lo aftho dımşahlıf i demoğrafya da fenyotho du camaydan b’Suriya, u dlohe i hiyoyuthayde i şerşoyto bu taro du mafhum di umtho Caraboyto.

Camgabıdathe, u malolo d’MUB mawdacle di tahrazto du rejim b’fusqono kamilo kımdawmo, bnişo dmıhyo darbo lu sebyono du camaydan, lu ağunayde u dıtıfkole li golutho, u hatheste bu darbo du zroco di fıtne u du fsoq sabro beyn du camo Suryoyo-Othuroyo, u bu tehdid du camaydanste di Maşılmonutho qşitho gıdmaydo dukthe du rejim du Bacıth ida dmitadre mu hıkım d’Suriya.

Calathe, u malolo ruşmoyo d’MUB Hanibal Yacqub mawdacle da teştıcınye du rejim d’Suriya lıkfayti fayış calu camaydan, u sımleste qroyto la gabe u tukose folitiqoye du camaydan dmahti ido bido u dımqadmi b’zuhoro rabo lu maşıqlano dkıtyo ğalabe ulsoyo lu dactith du camaydan dkobe ağuno leşan dmithabti a zedqayde bu haqlo umthoyo u athronoyo b’gawe du nomuso esonoyo hatho d’Suriya.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…