20/04/2021

U Mawtbo di fnitho d’Alberta b’Kanada mawdele bu qtolğenso dsim ba 1915

U Mawtbo di fnitho d’Alberta b’Kanada, mawdele bu qtolğenso dsim calan Armınoye ban 1915 u cal ışto qtolğense hrene dsimi b’athrawotho frişe dbritho.

Elo bi rmoytathe dmaqbılo bu Mawtbo nomusoyo d’Alberta, lo mbahıs calu qtolğenso dsim calu camaydan ucala Pontusoye.

U Mawtbo nomusoyo di fnitho d’Alberta b’Kanada, maqbele i rmoyto dımqadmo leşan i mawdyonutho bu qtolğenso dsim cal 7 came frişe dbritho. Camathe’ste i şultonutho d’Alberta m’akadla du yarhano d’Nison gıdmibayın yarho du tethkar da Sohde udu kroho da qtolğenso dan Armınoye.

İ rmoytathe mqadmo leşan u şeçoco da şultonwotho dımtaybi strateji leşan dmıkle qum du tuyobo da qtolğense u d’naqla hreto dlo mikarıri hawbani b’britho. İ rmoytathe’ste kıhobış belhude bıgawa u qtolğenso dan Armınoye, du camo d’Ukraina, u Holocaust da Yudoye, u qtolğenso dsim b’Rwanda, d’Srebrenica, u qtolğenso da Ezidoye u d’Rohingya.

Alberta hawyo i fnitho da 2 bıthır me Quebec dıkmawdıyo bu qtolğenso dan Armınoye u Senato d’Kanada’ste mawdewole ba 2002. mawdıc, di şultonutho d’Armenia matila funoyo me 10 taşdaryotho nuxroye dmawdaclın, dgımıştawtıfi bu duxrono şatonoyo du qtolğenso dgımisım 24 bu yarhano b’Yerevan.

U mede dıkgorış u zuhoro ba tebani, dlıkmibahıs calu qtolğenso dsim calu camaydan ucala Ponutoye’yo u hathe kıxulqo fsoqsabro u ruğzo beyn du camaydan.Elo bebzabno hathe kımadilo’ste cal 2 nuqze-1) u tenkiro Emwothoyo dkito mqabıl du camaydan aw ilo idactho dkito calu qtolğenso dsim calu camaydan ucala Pontusoye u 2) u ağono dıklozım u camaydan dımdawım dobe bkull haqlo u bkull duktho, leşan dmaşmıc i dacwayde.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…