U mawtbo di karxutho d’Stanbul dıkmidabır mi saqıbloyutho, mnaqele rişkarxutho zabnoyo laşan dımdabır a’sebwotho gawoye di mditho d’Satnbul

STANBUL – A’hadome du mawtbo di karxutho d’Stanbul dıkmişakıl m’314 farsufe dkıtne bi sagiyutho mu gabo saqıbloyo di CHP, mnaqelın athmıl Nuri Aslan li rişonutho di karxutho d’Stanbul bıthır mıdmıdle 177 qole mda hadome du mawtbo bu quwolo dsim. Lfuth u froshezwo dı Turkiya d’NTV, Aslan gdımdabır zabnoyith a’sebwotho gawoye di mditho d’Stanbul bu zabno dfayışle Ekrem İmamöğşu mi wolithayde. 

M’gabo hreno, u rişqutno dı Turkiya Rejeb Tayıb Erdoğan bu mamlo dsımle la qoyume du gabo di AKP bu parlamento d’Anqara mırle “farsufe mi saıqbloyutho rişoyto hınnene dımqadamlın mawdcınwotho u tahwiyotho bi sbutho di dacwa du fasad dıftiho mqabıl d’İmamöğlu, udmid fusqono dmitahwele hbuşyo yawme d’Huşabo dşaficina hul dmisım u bethdinayde”. 

Ucdo ste, a’tagılyotho du protesto hani da tmınyo yawme kımdawmi b’Turkiya xıd hfuxyo mqabıl du msoko d’İmamöğlu, u adyawma ba casrowat alfawo dıbnaynoşo layimi qum du benyono di karxutho d’Stanbul, u tcınlın bidothaye othwotho dı Turkiya u lohiyotho u pankarte dıkthew ebaye slogane mqabıl di şultonutho d’Erdoğan. 

Bu tarano, u rişono du gabo di CHP Özgur Özil mawdacle dgıdmakle i qroyto dıksamla la mtagılyone dlaymi kul lalyo qum du benyono di karxutho d’Stanbul, elo bebzabno Özil sımle qroyto dmitayıb taglitho rabtho yawme d’Şabtho dıbqamuthayna bi mditho d’Satnbul, cıl mdımtahıt mnoco qum da mtagılyone dlılaymi ba mdinotho d’Stanbul, Anqara u İzmir. 

Mxasra hreto, u waziro di gawoyutho dı Turkiya Cali Yirli Kaya bu knuşyo dsımle dayawma safrayto lu tboco froso, mawdacle dımsik 1879 farsufe dıkmıthomi dmıştawtaflın l’tagılyotho dlatne ruşmoye, baynothaye 260 farsufe dıkmidace dkıtlın esore cam 12 tukose marıhbone. Bi maqırhonuthayde, u waziro di gawoyutho mırle ste “i kinutho kmişarrıro bu bethdino, ulo ba zabuqone”.