U Mawtbo tahtoyo tlıble dmitabde buhone cala hawbe du qrobo b’Azerbaijan u di şultonutho d’Baku dmarfıyo a yasire kulle dımsiki bu zabno du qrobo d’Qarabax

U Mawtbo tahtoyo di kongre d’Amerika, rfıdle athmıl i rmoyto dımqadmole u hadomo di kongre Jamaal Bowman, leşan dmıhthomo i ithutho d’Amerika b’Suriya.

Bebzabno u Mawtbo tahtoyo tlıble dmitabde buhone cala hawbe du qrobo b’Azerbaijan u di şultonutho d’Baku, dmarfıyo a yasire kulle dımsiki bu zabno du qrobo d’Qarabax.

Bu quwolo dsim athmıl bu Mawtbo tahtoyo di kongre d’Amerika, rfido i rmoyto du hadomo di kongre mu gabo da demoqratoye Jamaal Bowman dtlıble eba, dmıhthomo i ithutho d’Amerika bıgawe d’Suriya belhude şato, bıthır mıd mafıtwo u qonuno la haye.

Leşan dmitaqbılo u dmitafito i rmoytathe i harayto, klozım i sagiyoyutho di kongre dım’aydowala, elo 286 hadome du Mawtbo tahtoyto rfidolın u 141 snidolın. Bi netiçe lo maqbılo i rmoytathe d’Bowman. 187 qutnuthoye u 99 demoqratoye rfıdlın i rmoytathe d’Bowman leşan u groşo da folhe Amerikoye me Suriya.

Me gabo hreno bu knuşyano du Mawtbo tahtoyo mid fusqono hreno bi sbutho du qlimo d’Nagorno Qarabax. A hadome du Mawtbo tlıble mi şultonutho d’Woşington dmisım buhone b’Azerbaijan cala hawbe du qrobo bu zabno da taxtuşe dhawın’wo ışqad camu gayso d’Armenia.

İ rmoytathe dımqadmole Adam Schiff, Tony Cardenas u Brad Sherman, tlibste me Baku, baroyo udlo tehito d’şartat dmitarfın a folhe wa mdinoye yasire kulle dkıtne msike b’Azerbaijan-lfuth a qonune Emwothoye uda konvenşin d’Geneve. A mtaybone di rmoytathe m’akadlınste, dheş hol adyawma kmımsık Armınoye cala thume du athro.