U Mawtbo Umthoyo d’Bethnahrin bi cohnutho da 25 eşne di mşatsonuthayde; ‘Bu stratejiyaydan di hdoyutho umthoyto, gıdqumrina’

BETH NAHRIN — Bu buyono dfrısla i Sictho di Rişonutho d’MUB bu yawmo şatonoyo di mşatsonutho du ağono umthoyo mawdacla; U Mawtbo Umthoyo d’Bethnahrin, dftıhle warqo hathto bu makthabzabno du camaydan, mabharle i şrorutho, mıdle asas a nubce du cılım dımramrımi cala mdinoywotho du athraydan, u maglele cala hawbe da zıhniyat du qtolğenso. A ftakare di hirutho dımşakli meqım 37 eşne, mşahlıfi lu sıbyono du mrodo umthoyo, u mşarele dhokım i siyase du lhoyo, du tenkiro udi lo kinutho. Bnişo dmişaklo i arcutho di hdoyutho umthoyto dkıtyo snıdto la falqe kulle du camaydan udu athraydan, mhalıq dawsat.

MUB mırle; Mqabıl dkull hçome u qtolcame da hayle dıkbışlın u athraydan, u dkıbci dlohınle mu makthabzabno. U halxo di hirutho dmabdelan, bu sabro du nuhomo dmıdlan i otho du cısyono lidothayna, u dqilan i lbibutho du teşmico du qolaydan la falqe du camaydan dfliğ cala thume, ulu ray gawonoyo dbritho, kımdawım hol adyawma. Calathe, a timoyotho dıqmiri bu yawmo şatonoyo di mşatsonutho da 25 eşne du MUB, mşakıl benyono caşino u doronoyo.

İnaqla dmisım u nuholo du makthabzabno du ağunaydan, mi şrorutho dmazıc u camo, d’maşle, dımbarbız b’britho u dtre dlo statü, gıdmıhze dnafıq sıbyono dkıtyo mtakso, dkobe mrodo u dıktolıb a zedqayde. Cal dımşawşıt şıkıl d’uslub, u ağuno hatho dıkrofıd ilo hiyoyutho, u fşoro wi lo athronoyutho, huwle tuxlono u sabro lu camaydan. Bu admo d’casrowat Sohde dhuwlın i nafşathe li sbuthathe, kthiw humose di gaborutho u mid naqla hreto duktho bi surath arco-xarita siyasi du Madınho Mescoyo u d’Bethnahrin. Cama talabaydan a umthonoye dınfiq me hatho lu maserho du makthabzabno, mşaklo’ste i arcutho di methkanşonutho du mathyo d’cama şutose u tukose du camaydan kulle, hedor da timoyotho mşawtıfe.

MUB komır; U mathyo dla tahrazyotho da hayle qlimoye u Emwothoye, qmoro maktabzabnoyo’yo leşan du statü umthoyaydan. İ şrorutho dıkcayşina kmişawşıto ba hamlat ulsoye dıkmisomi ba falqe du athraydan uba şutose dıkmişatsi. Ba 2025, ktıcnina i mşalutho wi idactho di methkanşonutho, hedor u strateji di hdoyutho umthoyto. U camaydan cal dımşawşıt folitiqoith, khoze a şuşote wa teştıcınye dhedore, u ksoyım u nuholo da dawsat dıklozım dmihalqi lu dactithayde. Xıd MUB bu haqlo folitiqoyo, diplomatikoyo, tukosoyo u ğer, matina lmaşıqlo ldarğo celaytır. İ marhalathe, mşakela nesyuno rabo, u sıbyono dımtakıs ba timoyotho.

MUB mırle; İ mathlonutho du camaydan bu maşıqlo du şuhlofano bu Madınho Mescoyo, cal dkıtyo mümkün bi hdoyutho umthoyto, knofıl mşalutho cala şutose u tukose du camaydan kulle, bgawaye a citotho’ste. U talabaydan u siyasi cal dkıtyo lu nişo du qmoro du statü umthoyo, klozım dmamtena a wolyothaydan di rişonutho bşıkıl dıkmalıq li duktho. Bu asasano bi cohnutho du yawmano di mşatsonutho da 25 eşne du MUB b’iqoro kmathkırina a Sohdaydan, u bnişo dmotina la nişe umthoye, kıqorina lu bınyonaydan kule, lu camaydan u mothonoyo, dmitakıs bi mşablonutho du ağunaydan u kımmina; Nihe lu Ağuno di Hirutho du Camaydan Dıkmitahwe bi Rişonutho du Mawtbo Umthoyo d’Bethnahrin.