U Mawtbo Umthoyo d’Bethnahrin bu buyono dfrısle kıkorih ‘u komplo emwothoyo dsim 15 Şbot’

‘Kokurhina u komplo Emwothoyo dsim 15 Şbot’ kımşare u buyono dfrısle u Mawtbo Umthoyo d’Bethnahrin u kımawdıc, di qutnutho d’Turkiya u benyono Emwothoyo d’Gladyo, mqabıl da ağune di hirutho da came du Madenho Mescoyo, sımme ğalabe cuqobe u hfitwotho mqabıl da demoqratoye u u hçome dkıtne larwal da qonune. Ha ma komplowiye u fahe rabe dsim mqabıl da came’ste, sımwo 15 Şbot dan 1999 calu rişono du camo Kurdoyo myaqro Abdullah Öcalan dmahzamwo bşıkıl gayoso-korsan mi arişkoyto d’Kenya u msıkwo yasiroyo.

Ğalabe hayle Emwothoye dmıde duktho bu komplano, dışşe a prensibe di kinutho u da zedqe noşoye wi celtho di mhaydutho dhawyo mu gabo da hayle hakome mqabıl du rişono du camo Kurdoyo, i falsafe du şroyo hatho dmamtele la qetre du Madenho Mescoyo, uli ciyeşe mşawtafto beyn da came’yo. Bi hzaytathe camgabe dmagle calu tenhibo, cala hawbe u cala tehriwe dsımme a hayle mıştacmrone bu makthabzabno kule, nafıq’ste mkono hreno d’sıbyono d’ağuno leşan a came dişe. İ celtho da hayle hakome dıksaymi fulhono dtorın mhile a ftakare du rişono du camo Kurdoyo dıkhozanne qento lu teksathe meqım dım’athri u dmibarbızı lu qlimo kule, u dmımte lhaylo d’methtaksonutho udı awyutho beyn da came, bnişo dtorın u statuko mankırono dkito’yo. U msokayde 15 Şbot dan 1999 uhol adyawma dfayıt 24 ışne bi gzırto d’İmralı d’Marmara tahte d’şuhodo-tecrit yaquro b’hobuşto-hücre, leşan dmınci a ftakare hirayde dlo motın la came’yo. Calathe u şbilo du tecrit camgabe dlatyo kino, huquqi u noşoyo ksoyım ixlal a timoyotho demoqratoye wa zedqe di cyeşe, hawbo’yo dsim ba reğşe faşist mqabıl di noşutho.

MUB mırle; U rişono du camo Kurdoyo ba renyayde du şroyo, rişono ulsoyo’yo dıkmimıd li dıqqa ma came du Madenho Mescoyo ume ğalabe noşe dbritho.  Camgabe dmahıtle u darğo da esore dıklozım dhowın beyn da came, kali’ste bcumqo cala esore du camo Suryoyo u Kurdoyo. Bu asasano bdarğo stratejikoyo mşawşıt mhaydutho u sıbyono d’mdabronutho mşawtafto beyn du ağuno di hirutho du camo Suryoyo u du ağuno di hirutho du camo Kurdoyo. İ methhazyonuthathe-u perspektifano du rişono du camo Kurdoyo Öcalan cal dmid asas, xliq arcutho dmişatıs sistem di demoqratoyutho beyn da came du garbiyo-madenho d’Suriya. İ mraşmonuthathe-modelano kıtle diloyto dkibe dmişawşıt b’Turkiya, Cıraq, İran, Lebnon u hatta bğer athrawotho. Leşanathe a came kulle mqabıl du qrobo, di mıştacmronutho, du floğo u dlatyo menayna dmisım şuhodo-tecrit, kıtla olsoyutho rabtho dımdafci i demoqratoyutho i hirutho leşan di cyeşe mşawtafto. Calathe u nfoqo dımqabıl du tecrit d’İmralı klozım dhuwyo i wolitho asas dkull farsufo u şutoso dkomır lruhe demoqrat dımdafıc u şbilo doronoyo, etnikoyo, tawdithoyo, mathab u di  hirutho da hiyoywotho marduthoye bu Madenho Mescoyo.

Bu huthomo i Sictho di Rişonutho kımmo; Bu asasano xıd Mawtbo Umthoyo d’Bethnahrin leşan dmitaqım u şuhodo-tecrit calu rişono du camo Kurdoyo-myaqro Abdullah Öcalan u dmote li hiruthayde, kmaczımina a şutose u tukose noşoye, tawdithoye Emwothoye, wa kenşe dfayti li harake. Camathe bnişo dhowın mcadrone bu tekliyo da taxtuşe uda qrobe dftıhlın darbo lhaşişe-trajediye bu qlimaydan, ktulbina dmimıd muhatap u rişono du camo Kurdoyo mu gabo d’Turkiya, Amerika, Urifi uman athrawotho du Madenho Mescoyo.