U MİT da n’istixbarat dı Turkiya hawile ytawto camu Gbino d’Alnusra

BAB ALHAWA, Suriya – U şutoso du MIT, awkith bu leşono turkoyo Millî İstihbarat Teşkilatı, da n’istixbarat dı Turkiya, sımle athmıl knuşyo ğnizo camu tukoso marıhbono du Gbino d’Alnusra bi nuqazto du thumo d’Bab Alhawa bu garbiyo d’Suriya. Bu knuşyano gawonoyith drişo i sbutho da çatawiye uda marıhbone nuxroye kulle dilonoyith a’çatawiye dkıtne frişe mu Gbino d’Alnusra. Bu knuşyano ste driş aydarbo kibe dmınfıq mqabıl du qento dkıtlın a’çatawiye nuxroye cala dawriyat folhoye Turkoye ucala fulhone dıksaymilın bu garbiyo d’Suriya, dilonoyith dıkmibahıs ucdo dkibe dmitadcıri a’dawriyat mşawtfe Rusoye u Turkoye du duyoqo du darbo d’M4 b’İdlıb.

U knuşyano dımdawamle hedor arbac şoce, mıştawtaflele arbco mşale mu MIT dı Turkiya, u arbıco hrene ma rişone du Gbino marıhbono d’Alnusra.

Meqım tre yarhe, an’istixbarat Turkoye sımwolın knuşyo bi nuqazto d’Bab Alhawa camu şutoso di mşaynutho gawonoyto du Gbino d’Alnusra. Bu knuşyano maslamwo lu MIT lohitho dkiba an’ışmone da çatawiye nuxroye bi mditho d’İdlıb u hedora dbalhude dkıtne frişe mu Gbino d’Alnusra, elo bi lohithathe lew duktho la çatawiye du gabo Maşılmono Turkistanoyo.

Lfuth North Press, kmıntır dmitayıb knuşyo hreno bayn du MIT wu Gbino d’Alnusra bu şuroyo du yarho d’Şbot dıbqamuthayna, laşan dmıdrış u dewam da duroşe dhawın athmıl baynothaye.

Bıthır mu knuşyo dhawi bı Mosko, kmahwe tlib m’Turkiya dımsafyo a’grube çaatwiye nuxroye dkıtne b’İdlıb ubu garbiyo d’Suriya. Mawxa ste kmıntır dhowe qrobo baynothaye ubayn du Gbino d’Alnusra, yaste dmitahwe l’Rusya mawdconutho cala dukotho da maşıryothaththe.