U mraşho d’Amerika xıd rişizgado hatho b’Turkiya mawdele bu qtolğenso da 1915

U mraşho d’Amerika xıd rişizgado hatho b’Turkiya-Jeff Flake, mawdele bu qtolğenso dsımwol i mamlaxtho da Cuthmanoye calan Armınoye bi şato dan 1915.

Jeff Flake, senator catiqo du gabo da qutnuthoye d’Amerika’yo uba buqore dsimi acme bu Senato, mawdacle’ste ilo thnihuthayde li mudaxala dhawila Turkiya bu qrobo d’Nagorno Qarabax.

Athmıl i sictho da esore baroye du senato d’Amerika mabdela buqore cama mraşhe hathe dımbayni li rişizgaduthathe dkıtyo b’Ankara. Ha ma mraşhe rişoye Jeff Flake dkıtyo senator catiqo da qutnuthoye mfanele cala şwole, cala renye u hzayothayde bi sbutho di siyase d’Turkiya.

Bu zabno da buqorani’ste, u senator Bob Menendez mşayelele u renyaydi menyo bi sbutho du qtolğensano wu mraşho Flake dkıtwole meqım renyo frişe-mşahlafe ucdo kulonoyith u renyayde u mawdele ruşmoyith bu qtolğenso dsımwola i mamlaxtho da Cuthmanoye calan Armınoye ban 1915.

Bebzabno Jeff Flake mawdacle di mudaxala dhawila Turkiya lu qrobo d’Qarabax cam Azerbaijan-mede dlıkmitaqbıl’yo u zıttır hawyo celtho dhuwro i aykanoyutho. Flake mırle; En dothe i mraşhonuthaydi dmitaqbılo, gıdsamno hboso cal Turkiya dhuwyo sanıdto lu şroyo du krizano beyn Armenia u Azerbaijan.

U mraşho Jeff Flake mırle’ste; Ono kısonadno a timoyotho demoqratoye wa zedqe noşoye u calathe kull naqla gıdmıjğalno i şrorutho dkito. U rişizgado d’Amerika d’ucdo David Satterfield’ste latyo thnihoyo mu qedomo qaşyo dkıtla Ankara li sbutho da zedqe noşoye, la zedqe du tbocofroso ula timoyotho di demoqratoyutho.