U mraşho du gabo d’HBA Josef Sliwa hule maqırhonutho li dafo d’Caynkawa cali tahrazto da guboyayde

U mraşho du gabo du Huyodo d’Bethnahrin Athroyo d’HBA la guboye gawonoye du Iraq Josef Sliwa, bi maqırhonutho dhule li dafo d’Caynkawa, mahkele cali tahrazto da guboyayde dıkmişaklo metlotho fosuqe umthoyo, athronoyo u noşoyo.

U mraşho Sliwa dkıtle u mnoyo da 141, bi maqırhonuthayde mawdacle dkıtle zuctho ma gabe da Şica u da Kurdoye dmıştacın bi netiçe da guboye du kontenjan du camaydan.

U qoyumo dmeqım bu parlamento du Iraq Josef Sliwa dkıtyo ucdo u mraşho du gabo d’HBA la guboye gawonoye dıkmıntır dmisomi 10 bu yarho dı Tışrin u Qadmoyo dıbqamuthayna, bi maqırhonutho dhule li dafo d’Caynkawa mahkele cali tahrazto da guboyayde u mırle “bu haqlo umthoyo di tahraztaydi gıdsamno u mede dıknofıl acli, bnişo dımşararno a’zedqe du camaydan u Kaldoyo Suryoyo Othuroyo uda came hrene qalile lfuth u nomuso esonoyo du Iraq, udmitahwele u camaydan u zedqo dhuwe dımdabır u qadar i ctidutho d’ruhe dlo mudaxalat u fuqdone m’noşe. Ubu haqlo athronoyo gıdnofaqno moro dfoyış u Iraq hiro rahuqo ma mudaxalat baroye, udhowele lfuth a’yuthrone mşawtfe esore b’şawyutho cama nathrawotho qlimoye u şbobe kulle, udhowele u Iraq momuno safyo d’ruhe udımşabıl u athro bu darğo qadmoyo. Ubi xasra du hqlo noşoyo klozım a şutose di şultonutho dımqadmi lu Iraqoyo xıd barnoşo dkıtyo u timayde u yaquro dkulle du athro”.

Camgabıdathe, u mraşho Sliwa mawdacle dıkmıtyaqın dgıdqathle qole mi sagiyutho da hiğmınwotho du Iraq, cal dıflıhle lfuth hzayto athronoyto şfitho. Elo bcayni zabno u mraşho d’HBA maglele cali zuctho dkıtle ma gabe u koalisyone rabe da Maşılmone Şica uda Kurdoye dsaym i hile udhowelın mudaxala ba hamşo kursiye du kontenjan du camaydan, awkith a’gabani kibın dgınwi menyono ğalabe celoyo d’qole dlatne du camaydan, ubu şıklano hınne ne dgımbayni a’mraşhe qamore du kontenjan du camaydan.

Bebzabno, u mraşho Sliwa mawdacle dlıkmıtyaqın dhowe mıştawtfonutho rabtho mu camaydan ba guboye dıbqamuthayna, cali dkito ğalabe ma n’abne du camaydan dıkmawdıci qrihoyith dlatlın lo sabro uloste tuxlono bu maşıqlo folitiqoyo du Iraq.

U mraşho du gabo du Huyodo d’Bethnahrin Athroyo Josef Sliwa, mawdacle ste di sbutho dlew fsoso la barmothoye dkıtne bi golutho dmıştawtıfi la guboye, gıdhowela hul darğo tathir cali netiçe da guboye du Iraq ucali netiçe da guboye du camaydan, u makadle ste du medano kdoyış u nomuso esonoyo du athro wa timoyotho demoqratoye.