U mşalo di siyase da esore baroye u di mşaynutho d’Urifi mowdacle d’lıgmanhıti katfo la gzome dı Turkiya

U mşalo  di siyase da  esore baroye u di mşaynutho  d’Urifi Josep Borell bi maqırhonutho dhule mırle lıgmanhıtina katfo la hiyal dkıbco saymo Turkiya bi sbutho da galwoye.

 Elo be bzabno Turkiya kımnasyo kulmede dkıtla laşan dımzawro u huyodo d’urifi dhowe sanodo bi sbutho da galwoye dkıtne b’Turkiya.

Bıthır mu qatlo da folhe Turkye, Turkiya ftıhwola atarceyda la galwoye dnıfqi l’Urifi xıd gzomo tahdid mqabıl d’Urifi. Elo hul adyoma Urifi lı manhatla katfo bi sbuthathe lı Turkiya, elo buhfuxyo du medano Urifi maqrahla dıgsındo u Yawnan u Bulgariya laşan du sutoro dkıtlın bi sbutho da galwoye dkothın me Turkiya.

Bi sbuthathe u  mşalo  di siyase da  esore baroye u di mşaynutho  d’Urifi Josep Borell meqım mu knuşyo da wazire di baroyutho d’Urifi hule maqırhonutho lu tboco froso.

Bi maqırhonutheyde mırle ahna u huyodo d’Urifi lıkhozina i sbutho da galwoye sbutho du bazar dı sayminala cam Turkiya. Elo ahna kudcina Turkiya kıtla tacno yaquro elo lıkmaqıblina dı Turkiya dmıstacmılo i sbuthathe xıd gzomo b’qamuthe da droşe.

Me gabo hreno lfuth a hızwone dkothın ma thume bayn Turkiya u lu Yawnan kmahwe ğalabe ftiho aydarbo Turkiya cam haylawotho di mşaynutho ksındi a galwoye dı fayti li xasra du Yawnan.