U notarozo gawonoyo du NATO hawile mamlo cam Erdoğan

U notarozo gawonoyo du NATO Jens Stoltenberg, hawile mamlo bu telefon camu rişqutno d’Turkiya Recep Tayip Erdoğan. Ba droşe dhawın beyn da 2 rişone, kalın dilonoyith calu kriz dkito ucdo bu yamo Mescoyo.

 Calu krizano dbeyn Turkiya u Yawnan calu yamo Mescoyo, u Huyodo d’Urifi fsıqle dlotım bu yarho dıbqamuthayna leşan dorış a tedbire dgımahıt cali şultonutho d’Ankara.

U notarozo gawonoyo du huyodo du NATO Jens Stoltenberg, hawile mamlo bu telefon camu rişqutno d’Turkiya Recep Tayyib Erdoğan leşan dorış acme u kriz dıkmdawım dı qoşe beyn Turkiya u Yawnan bu madınho du yamo Mescoyo.

Bıthır ma droşani, u NATO frısle maqırhonutho u mawdacle bu mamlayde Stoltenberg makadle cali ulsoyutho dmitabqi a qonune Emwothoye xıd asas, du şroyo da qetre dkito beyn da 2 athrawotho şbobe. Stoltenberg mşajacleste Ankara u Athena, dımsafın aşwolathe bu darbo du dialog mşayno.

Elo bu funoyayde Erdoğan mawdacle, du NATO lıklozım dmoyıd gabo dıkdoyış a qonune Emwothoye u dkobe husrono lu qlimo du qlimo. Cali mwatyuthathe beyn Turkiya u Yawnan, a rişone dan athrawotho hadome bu Huyodo d’Urifi gıdlaymi bu yarho dıbqamuthayna b’Bruksel, leşan dorşi a tedbire dgımahti cal Turkiya.

U mşalo da esore baroye du Huyodo d’Urifi Josep Borell dımakadle u snodo du Huyodo lu athro hadomayde du Yawnan, mawdacle d’ihtimal rabo gıdmıdroşi atedbirani dcal Turkiya bu knuşyo dıgmisım 24 bu yarho d’İlül. Wa tedbiraniste dkit dmitahti cal farsufe, sfinotho u mnoco dcubri la lmine dan athrawotho Urifoye.

Gıdmitahıtste mnoco dmitıstacmıl u teknoloji d’Urifi leşan Turkiya dılo qudro dkurxo calu ğaz u calu nafto bu yamo Mescoyo. Elo meqım me kull mede, u Huyodo d’Urifi gdımdawım dımşajıc a 2 athrawotho dımsafın u qetrano bu darbo du şlomo. Ğer mbahnoneste kmawdıci, du şıkıl da tedbirani dkobıc Urifi dmahıt cal Turkiya lıkımathri ğalabe calu plan dkıtla Ankara u calathe klozım dhowe tedbire qşeytır mu mede dmawdıc.