U Papa hatho du Vatikan, sımle qroyto la Mşihoye du Madınho Mescoyo dlo torın ma dukothathe a şerşoye u dfayşi ban athrawothathe

VATIKAN – U rişono ruhonoyo du cılmo Qatholiqoyo i qadişutho du Papa Mor Leo da XIV sımle mamlo bu Vatikan cali aykanoyutho da Mşihoye u kali dilonoyith cala Mşihoye du Madınho Mescoyo u tlıble menaye, dfayşi ban athrawothathe dnufqilın moro udlo mgalwın-walaw u qlimano kıcoyış qrobe, cnufyo u kmihadıd.

U Papa mırle bu knuşyo dsim beyn da citotho Qatholiqoye d’Madınho; Klozım dmitahwe mkono la Mşihoye-ulo belhude bu mamlo, leşan dqudri dfayşi ban athrawothathe uba zedqe kulle dıklozamlın leşan dım’amni i ithuthathe. Klozım kulayna camhıdode dımçahdina leşan u medano. Ahna hadire’na dsaymina mescoyutho beyn da rişone dan athrawotho dkıtne b’qrobo leşan dcawdina lu şlomo uli awyutho beyn dani dkıtne bcelıdbobe. 

U Papa komır; A came kulle ucdo sniqoye’ne l’şlomo ula rişonathe’ste komarno me lebi kule, toxu yutwina lu dialog. La rişone da citotho Qatholiqoye d’Madınho dıkmitafit u camathe ba rdufye tawdithoye-xıd Suriya, Cıraq, Lebnon, Ukraina uğer klozım dfulhina mqabıl da rdufyani bnişo da Mşihoye dhowelın sabro u nihutho ban athrawothathe u dhoyın b’neshono, dımdafci i haymonutho wi marduthathe. 

Papa Mor Leo XIV mırle; Kull naqla kibe dhowe qrobo elo ahna klozım dmaşlena u qolo du zayno cal du qrobano laybe dımamte şroyo elo belhude zıttır kımaqşe a qetre. Hani dıkmakthıwi ışmonaye bu makthabzabno-farsufe dıkm’athli u şlomo’ne u latne hani dıkxulqi a haşe rabe di noşutho. Britho lıkowe dmıfloğo beyn du tuwo udu bişo. U şbobaydan latyo bi qamayto u bcelıdbobaydan elo barnoşo’yo.