U Papa hıthımle aytawyotho dhawile cama rişone da citotho du camaydan u dan Armınoye b’Lebnon

İ qadişutho du Papa Mor Fransis Qadmoyo, athmıl casriye bi slutho dımrayşanle, hthımle a ytawyotho dhawile cama rişone da citotho du camaydan udan Armınoye d’Lebnon.

Bu mamlo dsımle i qadişuthayde, mawdacle da Mşihoye kıtlın methfathonutho la Maşılmone, bnişo dbonın i ahonutho u dmaqwın u şlomo.

Bu nişo; Gab Aloho kito renye du şlomo, camıhdode laşan Lebnon”, athmıl casriye bi slutho tibeloyto dımtaybo bi şuctho da şeth d’casriye bi cito d’Mor Fetrus bu Vatikan, hthimi a’ytawyotho dımtaybi athmıl bayn di qadişutho du papa Mor Fransis wa rişone da citotho du camaydan d’Lebnon awkith a’rişone di cito Marunoyto, Suryoyto, Malkoyto u Ewengeloyto ba tre mathhabaththe u acmaye ste u fatıryarxo di cito Armınoyto Ortodoksoyto d’Lebnon.

Bıthır mi slutho tibeloyto dımtaybo laşan dmitarku u şlomo b’Lebnon udmışre u krizayde, u papa Mor Fransis bi egartho dqıryole lu tboco froso mırle; Adyawma laymina laşan dımsalena udmıftakrina camıhdode laşan d’Lebnon. Kıtlan lothnihutho rabtho laf Lebnon dkıtyo b’Lebi udkobacno dsamnole socurutho, cal dıkloqe ucdo b’kriz du qento. Ino kımqadamno a’tawdiyothaydi la mıştawtfone kulle dmaqbelın baroyo i zminuthaydi wi mıştawtfonuthathe di ahonutho. Bu zabnano dkıtyo catumo mnaselan dımhalqina dawse lafu nuhro d’Aloho. Ubu nuhrayde hzelan a’fawde dsımlan bu zabno dlıshıdlan lu mgalyun mqadşo b’surto kamılto, u hzelan ste dımvayaclan a’gade di ahonutho, du şbuqyo udi hdoyutho.

Camgabıdathe, u papa Mor Fransis mawdacle dhınne xıd Mşihoye b’fusqono kamilone d’bonın u dactid camıhdode, cal du dactid laybe dhowe mşawtfo ida dlowe mşayno, wa n’esore bayn da bnaynoşo ste laybe dhowın banye calu asas da yuthrone farsufoye. İ qadişuthayde mawdacle ste da Mşihoye qaryene d’zırci u şlomo ud’sınci i ahonutho, udlıcayşi bu cuhdono da ruğze du dacbar, elo b’ha darbo dıkmawdın ele yo dkıyo u darbo du şlomo. Mawxa ste i qadişuthayde makadle da Mşihoye ftihene la Maşılmone ula tawdiyotho hrene, u hadirene dhowelın methcadronutho laşan u bnoyo di ahonutho wu teqwiyo du şlomo.