11/03/2021

U Papa sımle qroyto dımdawmo islutho leşan du athro du Iraq

İ qadişutho du Papa du Vatikan Mor Fransis Qadmoyo, sımle qroyto dımdawmo islutho leşan u athro du Iraq.

 İ qadişuthayde bi maqırhonutho dfrısle bi dafayde du Twitter mırle; Toxu dımdawmina a slawothaydan leşan u Iraq ulu Madınho Mescoyo. Bu Iraq cıl mıd kito shofo u zayne, elo a dawme da tamre dkıtne remzo du athro, kımdawmi dmawrıqi u dmamtın fire.

 U Papa Mor Fransis Qadmoyo bıthır mıd mkamele i socuruthayde lu Iraq u d’dacır naqla hreto luVatikan, mşadarle egrotho d’tahınyotho lu camo du athro, li şultonutho d’Boğdod u d’Arbil cali baytoyutho dsımlın li socuruthayde uli hubo hamımto uli calaqa dmahwelın ele. U Papa mqadamleste a tahınyothayde lu rişqutno Iraqoyo ula fatıryarxe ula hsayo kulle u mırle; U zayno u qrobo, lıklozım dmifanın bu cnufyo elo bu hefodo di ahunutho dbeyn da came.

Mxasra hreto, nafıq mwatyutho beyn d’Turkiya u du qlimo d’Kurdistan du Iraq, calu tabco hatho dıkmahwe ebe i xarita d’Kurdistan cami sırto du Papa. Cali sbuthathe, i wazirutho di baroyutho d’Turkiya mırla; Grışle u zuhoraydan du tabco dıkmıntır dmawfaqle u qlimo Kurdoyo bi cohnutho di socurutho dsımle u Papa. Bu tabcano rşim xarita dkibaste hın mdinotho Turkoye. Hın ma rişone di mdabronutho du qlimo dşafici a thumathe, kımnasın dmıstacımli i socuruthathe, leşan dmaglın cala hulme xalye dkıtlın li hdoyutho dan athrawotho şbobe du Iraq. Klozım i mdabronutho du qlimo Kurdoyo dmamtiyo l’bola aydarbo hawxa nişe lo makşarlın. Knıtrina mi mdabronutho du qlimo dfırso buyono, leşan dmitarıs u fawdano b’surhobo.

Megabo hreno, u malolo di şultonutho du qlimo d’Kurdistan Gotyar Cadel bu mamlo dsımle, mawdacle di nusxo du tabco dıktocın i xarita rabtho d’Kurdistan dıfriso bi cohnutho di socurutho du Papa, heş lo maydo ruşmoyith mi şultonutho du qlimo leşan dmitabde u tbocayde.

U malolo mırleste A şıklat da tabce kminaqın lfuth a prensibe qonunoye du nomuso esonoyo, u ğalabe nusxe da tabce mqadmi leşan dmisım u tbocathe, elo u tabco di xarita rabtho d’Kurdistan hulucdo lo m’ayıd. Cıl mıd kıtne a esore qawye beyn di şultonutho du qlimo d’Kurdistan u d’Turkiya, elo kmahwe da rişone Kurdoye kulle, bha nişone inaqla dıkmibahıs cal Kurdistan i rabtho.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…