22/06/2021

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe lfuth u fusqono dımaqbalwo bu prensip mi şultonutho d’Boğdod ba 2016.

Bebzabno, u parlamento d’Kanberra bi rmoyto dımaydle, mıctarafle du camo Othuroyo kımathıl u camo şerşoyo du Iraq, u sımleste qroyto l’Turkiya dmakılyo baroyo a hçomayda cala qıryawotho du camaydan bu garbiyo du Iraq.

Calu talab dhawiwole u Mawtbo Umthoyo Othuroyo d’Australya, u qoyumo federaloyo mu qlimo d’Mekmahon Kris Boen dıkmidıc bu snodayde la sebwotho du camaydan bu Iraq, mqadamle rmoyto rwihto lu parlamento d’Kanbera laşan dmıdroşo udmisım quwolo acla. İ rmoytathe dıkmişaklo mhammış nuqze, Boen ksoyım qroyto lu parlamento d’Australya dmıctarıf du camo Othuroyo Mşihoyo u camo şerşoyo u catiqo dkulle du Iraqyo, u kımşaçıcste i şultonutho d’Boğdod dımgaşmo u medano b’gawıd du nomuso esonoyo.

U parlamento d’Australya kımcaqıb u nişo dkıtle u camaydan dmişatasle şultono yothoyo bi daşto d’Ninwe, u kımhane i şultonutho du Iraq dımayadwola u talabano bu prensib bi şato da 2016. U parlamento d’Kanbera cal dkıtle haç da n’Othuroye kıbci dmişataslın şultono yothoyo, ksoyım qroyto li şultonutho du Iraq dmaydo a’tedbire dıklızmi kulle, laşan dmisım u sutoro da zedqe noşoye da qalilwotho, baynothaye an’Othuroye Mşihoye, udmısnıd ste u dewam du leşonaththe uda cyodaththe a’marduthoye u tawdithoye.

U parlamento d’Kanbera kımakıd naqla hreto cala zedqe da Mşihoye uda qalilwotho hrene du Iraq dcayşi b’şlomo ub’hirutho, u ktolıb ste m’Boğdod dsaymo u garanti dqıdri a’kenşe dıhzelın husrone dcayşi b’hirutho b’gawıd du athraththe. Ubi haryato di rmoyto, u parlamento d’Australya ksoyım qroyto li şultonutho dı Turkiya d’baroyo dmakılyo a’cuqobe folhoye dıksaymolın ba fenyotho mdinoye bu garbiyo du Iraq, udhawın celtho dmitaxle ba casrowat d’qıryawotho Othuroye ma comuraththe, u dımgalwın ba n’alfowat hrene ma fenyothaththe.

İ rmoytathe dımqadmole qoyumo Kris Boen, u parlamento federaloyo d’Australya b’ha femo maydole bu quwolo dsımle bıhdo ytawto dhadırla rişone u hadome dhın ma şutose hfite du camaydan, baynothaye u Mawtbo Umthoyo Othuroyo d’Australya, u federasyon da knuşyotho Othuroye b’Australya, i knuşto d’Mor Zayya wi knuşto Othuroyto du Xabur.

Check Also

YPG maglela cali hiyoyutho da Sohde dmahrawla Turkiya wa marhıbonayda a bethqburathe b’Cafrin

Bi maqırhonutho dıfrıslın a Haylawotho du sutoro du Camo-YPG, maglelın cali hiyoyutho da S…