08/10/2020

U parlamento d’Turkiya mayadle dımdawmo i ithutho da folhathe bu Iraq u b’Suriya

U parlamento d’Turkiya mayadle irmoyto dımqadmo, leşan dı qudro i şultonutho d’Ankara dımdawmo i ithuthayda i folhoyto bu Iraq u bı Suriya şato hreto.

 Camatheste u rişqutno Erdoğan makadle i ithutho folhoyto dkıtla Turkiya bu athro d’Qatar.

Bi ytawto dhawyo athmıl bu parlamento d’Turkiya, drişo irmoyto dımqadamle u rişqutno Recep Tayip Erdoğan. İ rmoytatheste cali ithutho da folhe Turkoye ban athrawotho şbobe Suriya u Iraq’wa. Bu quwolo dsim cali rmoytathe, u parlamento maqbele dımdawmo i ithuthathe i folhoyto ba 2 athrawothani şato hreto.

Awkith bi rmoytathe, kmitahwe aftho li şultonutho dımdawmo a cuqobayda mcala thumayda calu Iraq u cal Suriya l’zabno şato hreto me 30 bu yarhano u hol 30 bu yarho d’Teşrin u qamoyo da 2021. A gabe d’AKP, CHP, MHP u İyi Parti snıdlın i rmoytathe elo u gabo d’HDP rfidole.

Megabo hreno u rişqutno d’Turkiya Erdoğan adyawma makadle, dkıte ithutho folhoyto b’Qatar. Lfuth Erdoğan u nişo di ithuthatheste, dımamni i şalyutho wu şlomo d’Qatar u du qlimoyo. Erdoğan mdacele u mırle; İ ithutho da hayle Turkoye b’Qatar, dımamni u şlomo lo belhude b’Qatar elo bu qlimo du Xalijyoste.

U rişqutno Turkoyo mırleste; Noşo lıklozım d’cojız mi ithutho folhoyto dkıtlan b’Qatar belhude hani dkubci dı xulqi kriz u jğuşyo bu qlimoyo dgıcujzi. Turkiya lıkfayşo b’Suriya hol colam, u gıdmıgroşo me tamo inaqla dmiqafe şroyo lu kriz du athro.