12/03/2021

U Parlamento d’Urifi maqrahle a hayle d’Qasad hayle bnayqyomo d’Urifine

 U parlamento d’Urifi, frısle maqırhonutho calu yawmo şatonoyo da 10 eşne du qrobo gawoyo d’Suriya. İ maqırhonutho rwıhto dıfriso, bşıkıl rwiho kmitahke cali aykanoyutho d’Suriya, a cuqobe wa kboşe d’Turkiya, u dyoşo da zedqe noşoye b’Suriya, u strateji du Huyodo d’Urifi b’Suriya u ğer nuqze ulsoye.

Bi maqırhonuthatheste, mbayni a Haylawotho d’Suriya Demoqratoyto xıd hayle bnayqyomo d’Urifi, dkobın ağono mqabıl da ğrobe marhıbone d’Dacış.

U parlamento d’Urifi, frısle maqırhonutho dkıtyo qarıwto l’20 warqe-mşakalto me mınyono celoyo d’nuqze, dıkdayqi haqle frişe du qrobo gawoyo d’Suriya mu zabno dımşarele uholucdo. İ maqırhonuthathe’ste friso bi cohnutho da 10 eşne dşafici calu qrobano dım’atharle lo belhude cal Suriya, elo calan athrawotho şbobe u hatte dbritho. İ maqırhonuthathe dıkmişaklo me fosuqe frişe, griş u zuhoro cala fulhone dıkmaşyo Emwotho Mhaydotho leşan dmiqafe şroyo folitiqoyo lu krizano, a şwole wa qetre d’xlıqle u rejim wa hayle muttafikayde dhawın celtho dlo naçihi a ytawyotho du şlomo udu haqlo folhoyo, holucdo lo msafele u krizano d’Suriya.

Bebzabno bi maqırhonutho kle calu kriz noşoyo, i mekanizma di şalyuthzayno dlo mtabqo u mawdıc, dhol dlowe şuşoto bıgawe d’Suriya, dlo misomi a guboye, dmihaşwo i mdabronutho d’al Asad, dlo mitahıt tedbire cala İranoye u Rusoye udu rejim, lıgmışre u krizano. Camathe’ste friş duktho rwıhto calu kboşo d’Turkiya calu garbay madınho d’Suriya u aydarbo Rusya u Darımsuq u acmaye u İran u Turkiya kımaşın hawbe u dıklozım dmıgroşi mu garbyo d’Suriya u kriho a cuqobe dsımlın. Tlib’ste mu rejim d’Suriya dmarfe hol 130 alfo hbişoye u dmitacbır mcadronutho noşoyto lu camo sniqoyo du athro.

Bi maqırhonuthathe’ste, u Huyodo d’Urifi mawdacle u snodayde la hayle du koalisyon Emwothoyo bu ağono dkobe mqabıl da marhıbone d’Dacış uda Haylawotho d’Suriya Demoqratoyto, hayle muttafik’ne dhuwlın mrodo caşino mqabıl du tukoso marhıbono. Uda tedbire dıkmimodi mqabıl d’Dacış udğer tukose dıkmifaşqi marhıbone mu Mawtbo di Mşaynutho d’Emwotho Mhaydotho, klozım dmisomi lfuth a qonune Emwothoye wa hayle nuxroye’ste, klozım dmaydi i mşaluthathe u dımtabqi a qonunani. I maqırhonuthathe’ste, gıdmiqadmo lu Mawtbo d’Urifi, lu mşalo da esore baroye du Huyodo, la parlamentowiye ula şultonwotho dan athrawotho bnayqyomo d’Urifi, l’Emwotho Mhaydotho, lu Huyodo Caraboyo, lu mathlono Emwothoyo b’Suriya uğer.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…