U Parlamento d’Urifi mraşahle hasyo mu cameydan lu şukono d’Sakharov

U parlamento d’Urifi, mraşahle hasyo mu camaydan di cito Kaldoyto d’Bobel lu şukono d’Sakharov, cal dnafıq moro lıba mowat kıthawyotho makthabzabnoye du camaydan bu zabno dıkbışwolın a marhıbone d’Dacış i mditho d’Mawsal ba 2014.

 Bebzabno mqafe athare u mosaik dıhdo ma citothaydan bu tayman madınho d’Turkiya. Mqafeste duktho du arkeoloji bi qritho d’Simele bu garbyo du Iraq dkıtyo 1500 eşne catıqto.

U hasyo di cito Kaldoyto di marcitho d’Mawsal Najib Mixael Moussa, mraşıh lu şukono du parlamento d’Urifi dışme Sakharov Prize. U hasyo mraşıh, cal dımhafadwole u tlewole 800 kıthawyotho catiqe du camaydan leşan dılo nufli bidothe da ğrube marhıbone d’Dacış bu zabno dıkbışwolın i mditho da 2014.

Akthawyothaniste mu doro da 13 u holu doro da 19’ne u bıthır nqiliwo l’Fransa leşan dmisomi digital u mahtiwo b’methhawyonutho b’Fransa u bı İtalya. Elo u hasyo di cito Kaldoyto, nafıqste moro lhol 8 alfo kthawyotho u hol 35 alfo tahwiyotho di cito Kaldoyto. U parlamento d’Urifi mawdeleste bu tacbo du hasyo bu zabno du camaydan jbırwo dımgalwe ma dukothayde lu qlimo d’Kurdistan.

Şukonano d’Sakharov dkıtyo cal ışme du yadıcthono Rusoyo Andrej Sakharov, mşataswo mu parlamento d’Urifi ban 1988 u kmitahwe l’farsufe aw ğrube dbıhlın nafşaye leşan u sutoro da zedqe noşoye u li hirutho du renyo.

Mxasra hreto anarkeolog du tayman madınho d’Turkiya, ba hfaryotho dsımlın bi qritho d’Göktaş b’Mırde, mqafelın mosaik catiqo bı cito du camaydan dkıtyo 1600 eşne catıqto. İ citatheste mqafyowa 18 bu yarho d’İlül da 2019 u bu mosaik u ba rşome dımqafe bi citathe, kitoste kıthawto du Estrangeloyo.

Bebzabno anarkeolog du qlimo d’Kurdistan mawdaclın, dımqafelın duktho du arkeoloji bi hiğmonutho d’Nuhadra. Bıthır 2 şabe dbuhone, mqafelın 53 falqe dathare dıkducri lımeqım 1500 eşne u dkıtne heş bı aykanoyutho ğalabe tawto. İ duktho dan atharaniste b’Simelene dsımwo eba qtolcamo calu camaydan ban 1933.