U qentrun du tboco froso d’Qasad frısle tebe cala şuşote haroye u da cuqobe dsımlın a Mharbonathe ba kmo yawme haroyani
U qentrun du tboco froso da Haylawotho d’Suriya Demoqratoyto frısle tebe cala şuşote haroye uda cuqobe dsımlın a Mharbonathe ba kmo yawme haroyani.
Mawdıcste d’taşdarto mu koalisyon Emwothoyo sımla socurutho li Hasake u be bzabno frısle u koalisyon maqırhonutho, dıkmhanle i dbihutho nafşo da hayle d’QASAD bu huroro di mdito d’Raqqa ba 2017.
Ba cuqobe casye dsımlın a hayle d’QASAD, msıklın marhıbone d’Dacış u qtilın hreno bu qlimo d’Deyr Ezzor bıthır ma taxtuşe dhawın beynothaye. U cuqobano sim mşawtıfo ma Mharbone d’QASAD udu koalisyon Emwothoyo dkıtyo bi rişonutho d’Amerika. U cuqobano’ste sim bu taro di kampanya hathto dmabele QASAD wu koalisyon Emwothoyo b’Deyr Ezzor.
Camatheste mawdıc, d’taşdarto mu koalisyon Emwothoyo u fırco dcala sebwotho da mdinoye, sımla socurutho li Hasake dhuzyo i aykanoyutho di sniqutho dkito bi mdito-xıd mathlo u şwolo du muklo udğer mluwe, i sbutho di ciyeşe da mdinoye uğer qetre.
Me gabo hreno, u koalisyon Emwothoyo mşadarle egartho la hayle d’QASAD bu duxrono şatonoyo dan 4 du huroro di mdito d’Raqqa ma ğrobe marhıbone d’Dacış 17 bu yarho d’Teşrin u qamoyo da 2017. U koalisyon mırle; Kımqadmina a tahınyothaydan li dbihuth nafşo dmahwıyo bu zabno du qrobo mqabıl d’Dacış wu sebyono qawyo dmahwele QASAD leşan u huroro di mdito.
U koalisyon mırle’ste; Kımcaydina an 4 eşne du huroro d’Raqqa ma marhıbone umi mdabronutho qşitho dkıtwolın cali mdito. Bu mrodano dhiw mşawtıfo mu koalisyon Emwothoyo, a Mharbone d’QASAD dlo zuctho huwlın ağono caşino mqabıl d’Dacış u dfıdelın a hayathe bu qrobano. Ahna kıfayfina rişayna qum da Sohde d’QASAD u kıtlan iqoro lu tacbo dıkmitahwe, leşan dqodır naqla hreto u camo d’Raqqa dcoyış b’nihutho.