07/05/2021

U qetro da maye b’Suriya heş kımdawım

Hın yadıcthone bu haqlo da maye, şutose da zedqe noşoye u mşale mi Mdabronutho yothoyto du garbay madınho d’Suriya wi şultonutho d’Darımsuq, krıhlın u qedomo d’Turkiya bi sbutho du qtoco da maye du nahro d’Froth dıkşofıc me Suriya u mu Iraq.

Ba hfuxye dmahwelın a mşale u şutose mşahılfe, makadlın d’Turkiya kmıştacyo i warqo da maye mqabıl du Iraq u Suriya.

U yadıcthono Iraqoyo dcala maye Şukri Alhasan, bi maqırhonutho, mawdacle du nahro d’Froth hani zabno yarixo kıtle bsirutho da mayayde, bi netiçe da masxore rabe dbnela Turkiya calu nahro. Alhasan mawdacle d’Ankara kmıstacımlo i warqo da maye mqabıl d’Boğdod u Darımsuq, u mırle; U Iraq layto b’idothe warqe dsoyım hboso qaşyo cal Turkiya, mawxa u Iraq klozım dhowe hadiro dnofıq mqabıl di bsirutho da maye, bu zabno dlatlın a rişone folitiqoye haylo dsaymi bazare cam Turkiya leşan u Iraq dqathle a zedqayde da maye. Alhasan makadle du Iraq azoloyo l’maşıqlo di naşifutho dgıdgurşo hul 5 eşne.

Mxasra hreto, i Mşatasto  da zedqe noşoye d’Suriya, mzaharla dhathe i naqla qamaytoyo bu makthabzabno dıknuqso i kmoyutho da maye du nahro d’Froth l’5 metrowiye, mi celtho du qtoco da mayayde me Turkiya. İ Mşatasto mawdacla du qedomo d’Turkiya dyoşo qrihoyo calu qyomo dımdewo beyn Suriya u Iraq u Turkiya ban 1987. Lfuth u qyomano Turkiya klozım b’zabno d’rıfıfto hdo dmarfiyo 500 metrowiye mkacbe ma maye d’Froth leşan u Iraq u Suriya dfulği hınne’ste u sahmaththe da maye. Bebzabno, griz u şuhoro calu gedşo noşoyo dıkmhadıd a haye wi ciyeşe dhol 3 mılyune d’Suriye dkıtne sniqoye la maye du ştoyo, lu kahrobo uli zaricutho.

Me gabo hreno, u rişono zawgoyo di sictho di karxutho udu kyono du qlimo di Gozarto d’Suriya Sulayman Carab, mawdacle da fenyotho du garbay madınho d’Suriya kloqın ucdo b’gedşo noşoyo, cal d’Turkiya kıqutco a maye du nahro. Carab bi maqırhonutho dhule, grışle u zuhoro calu husrono rabo dhawi l’ba mo alfayo d’arcotho di zaricutho, ulu haqlo du kahrobo, u sımle qroyto l’Emwotho Mhaydotho dsaymo hboso cal Ankara, leşan dlowe gunho noşoyo lu garbay madınho d’Suriya.

Camgabıdathe u bıthır mu şetqo dıkmdawım hani 3 yarhe, u waziro da mabuce da maye bi şultonutho d’Darımsuq Tammam Racıd tlıble me Turkiya dmarfiyo i sahmo da maye dkıtla Suriya mu nahro d’Froth, u sımle’ste qroyto lu kenşo Emwothoyo dımdaxıl bi sbuthathe u mırle; U dewam di aykanoyutho ducdo, kımhadıd i mşaynutho da maye da mdinotho d’Raqqa, Deyr Ezzor u Hasake.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…