U qlimo d’Kurdistan adyoşe dıksoyım bhaq da narcotho u mulkone d cameydan kımdawmi

Adyoşe dıksaymolın i şultonutho du qlimo d’Kurdistan du Iraq bhaq da narcotho u mulkone du camaydan kımdawmi.

 A Kurdoye dkıtne a şbobe di qritho d’Bibozi du camaydan bu garbiyo du Iraq, kımdacın ucdo dkıtne a more di cayno da maye u hın ma narcotho dıknıfli bgawıd da thume di qritho.

 Bu taro di şişaltho da dyoşe dkımdawmi calu camaydan u Kaldoyo-Suryoyo-Othuroyo bu garbiyo du Iraq, i yadıcthonitho bu haqlo du huquq Muna Yaqo maglela cal dacwa dı dhılmiye hathto dıkmisomo calu camaydan di qritho d’Bibozi dkıtyo masırto cami fnitho d’Atruş bi hiğmonutho d’Nuhadra. Yaqo bi maqırhonutho dıfrısla bi dafayda du facebook, mawdacla da comure di qritho d’Aa Sanka dkıtne bi sagiyutho Kurdoye, kımdacın ucdo u bşıkıl dlıkmıntarwo dkıtne morıd di cayno da maye u dhın ma narcotho di qritho d’Bibozi.

Lfuth Yaqo, a’thume di qritho d’Bibozi du camaydan idicene, u mıthabtene b’xarita u bı tapowiye ruşmoye, wi cayno da maye hani mowat dışne cayıd li qritho d’Bibozi. Bebzabno, Yaqo mawdacla da comure di qritho du camaydan rfıdlın dmibayni athume di qrithathe mi şultonutho du qlimo d’Kurdistan, cal dkıtlın ithbate ruşmoye da mulkonani dıthene, u hın ma Kurdoye şbobaththe ksıhdi lu medano.

Camgabıdathe, Yaqo mathkarla di sictho dımşatsola i şultonutho d’Arbil udıkmişaklo me hamşo farsufe Kurdoye, bu fusqono dmıdla bi sbuthathe mawdacla di cayno da maye wa narcotho mulkone da Kurdoyene, elo u camaydan di qritho d’Bibozi dırfıdle u medano lımdeleste calu fusqono di sictho.

Callathe, i yadıcthonitho bu haqlo du huquq Muna Yaqo dkıtyo ma nabne du camaydan du Iraq, mşadarla qroytotho lu rişwazire du qlimo d’Kurdistan Masrur Barzani, la mathlone du camaydan bu parlamento du qlimo, la tukose emwothoye da zedqe noşoye, la şutose umthoye du camaydan bi golutho u lkul man dkımwasıf i şultonutho d’Arbil u dıkmawdıc dkımqadmo b’kinutho lu camaydan. Ba qroytothani dsımla Yaqo hawxa mşayela: hol ema gdımdawmo i şalyuthfemo mqabıl da dyoşani؟ hol ema gıdmazditu a celotho di golutho da Mşihoye mu cafrathe u maktabzabnoyo. Hani dkımwasfi u nesyuno dkıtle u qlimo cama qalilwotho, mın gıdsaymi laşan dmitaqimo i dhılmiye dkito bhaq da comure di qritho d’Bibozi. U heş kımşaylitu qay hawina qalilutho. Aykoyo i şultonutho du qlimo d’Kurdistan mi kinutho lafu camaydan.