U qoyumo Hollandoyo Sander Smit sımle mamlo bu parlamento d’Urifi u mathkarle u qtolğenso dsımwo meqım 110 eşne calan Armınoye, cala Suroye (Kaldoye-Oromoye-Othuroye) ucala Pontus Yawnoye

BRUKSEL – U qoyumo Hollandoyo Sander Smit mu gabo d’Boer Burger Beweging-BBB dkıtyo bu gbino d’EPP du Huyodo d’Urifi, sımle mamlo bu parlamento Urifoyo calu qtolğenso dan 1915 wa hawbe dıkmdawmi hol adyawma cala qalilotho bu Madınho Mescoyo. U qoyumo mathkarle u duxrono şatonoyo da 110 eşne du qtolğenso dsımwo cal milon u falge d’Armınoye mi mamlaxtho da Cuthmanoye cal dkıtwolın hiyoyutho u tawditho mşahlafto. 

Smit bu mamlayde mırle’ste; Cayni barbroyutho rabtho laqınwo’ste a Suryoye Othuroye Kaldoye u Pontus Yawnoye mi mamlaxtho. Hano latyo belhude mede dhawi bu dacbar, elo hol adyawma’ste kmitaşe rdufye qaşye u kmınhori a Mşihoye, a Calawiye, a Ezidoye wa qalilotho hrene ban athrawotho du Madınho Mescoyo.

Smit dgrışle u zuhoro cali yortutho dan Armınoye b’Nagorno Qarabax aydarbo mahrıwo bşıkıl sistematik u aydarbo britho fayişo b’şetqo mqabıl du qtolqenso dan 1915 u dlo mahşıwi a hayobayde. Bi netiçe sim qtolcame hathe-hatta b’Urifi’ste, u calathe u sutoro da qalilotho klozım dhowe wolitho ulo slogan, bnişo dmihafdi a camani u dmıkrohi a hawbani dsim aclaye b’qaşyutho.

U qoyumo Sander Smit bu huthomo mzaharle u mırle; Hathe’ste kımşaryo bi mawdyonutho du qtolğensano man athrawotho hadome du Huyodo d’Urifi u acmaye Turkiya. Dlo mawdyonutho laybe dhowe kinutho-dlo mi kinutho laybe dhowe şlomo u awyutho. Calu mamlano du qoyumo, şutose frişe du camaydan; beynothaye ESU, mqadamlın tahınyotho li çasara dmahwele u qoyumo bu parlamento leşan i mawdyonutho du Sayfo dan 1915.