U qoyumo Yezidoyo bu parlamento du Ciraq Mahma Xalil, mawdacle du parlamento gıdımşare calqariwo dmoyıd tedbire ruşmoye laşan dmişahılfo i qastra d’Şigur l’hiğmonutho

BOGHDOD – U qoyumo Yezidoyo bu parlamento du Ciraq Mahma Xalil bi maqırhonutho dhule li dafo d’Bas News mırle “a’fulhone kulle gıdmisomi ba zabne dıbqamuthayna, laşan dımşarın a’tedbire bi sbutho dmişahılfo i qastra d’Şigur l’hiğmonutho. Kito ucdo tarmitho kamılto bi sbuthathe, ukmisım fulhone çıddi laşana b’gawıd du parlamento du Ciraq”. 

Qoyumo Xalil dkıtwe meqım u qaymaqam d’Şigur, mawdacle di qastra d’Şigur kşuyo ma xasawır kulle dhuyo hiğmonutho, ulaşan dmitahwe funoyo la talabe da comure di fnitho, Şigur sniqoyto ucdo l’snodo ruşmoyo mi şultonutho federaloyto d’Boğdod laşan dmişarır u nişano udmişahılfo l’hiğmonutho. 

Bebzabno, Xalil bi maqırhonuthayde mawdacle da comure d’Şigur ğalabe naqlat tlıbwolın dmişahılfo i fnithaththe l’hiğmonutho masırto camu qlimo d’Kurdistan du Ciraq, u mamtele ste lubolo d’zıd m’90% ma comure d’Şigur huwolın qolaye li şaryutho du qlimo d’Kurdistan bu funcomo dsımwo bi şato da 2017. 

Camgabıdathe, u qoyumo Yezidoyo mawdacle di tarmithathe zedqo la n’abne d’Şigur yo bu haqlo di mdabronutho udi mşablonutho, dilonoyith bıthır mıdcayişi l’ışne yarixe haşe kenşoye udi mşaynutho. 

Meqım mathe bu yarho d’Nison dşaficina, a’gabe u tukose folitiqoye Kaldoye Suryoye Othuroye dkıtne hadome bu koalisyon d’Athra, bu buyono mşawtfo dıfrıswolın tlıbwolın dmişahılfo i fnitho di daşto d’Ninwe l’hiğmonutho xıd aydarbo mşahılfe Halapça l’hiğmonutho bu qlimo d’Kurdistan. A’gabe u tukose d’Athra mawdacwolın ste du medano zedqo ruşmoyo lfuth u nomuso esonoyo, bnişo dmınfıq moro la diloyotho marduthoye, tawdithoye u umthoye di daşto d’Ninwe.