21/03/2021

U Qusro Heworo hule funoyo cali egartho laşan i mawdyonutho du qtolğenso da 1915

U Qusro Heworo mfanele i egartho dımqadamle u senator demoqratoyo Bob Menendez cama 37 senatore hrene dımdewolın cali egarthathe, leşan i mawdyonutho bu qtolğenso dan Armınoye.

Bu funoyano dhuwle u Qusro Heworo mırle; Klozım dmawdena cali ulsoyutho dkıtle u makthabzabno xıd iqoro li sbutho du qtolğenso dan Armınoye.

Malolo du Qusro Heworo, mfanele i egartho dımqadamwole u senator Bob Menedez bi mıştawtıfonutho di qroyto dhol 37 senatore hrene-hem demoqratoye u hemste qutnuthoye, sbutho di mawdyonutho bu qtolğenso dan Armınoye. İ şultonutho Amerikoyto dkıtyo bi rişonutho du rişono Joe Biden, kmıtyaqno bi ulsoyutho di mawdyonutho dcalu qtolğenso dsımwola i mamlaxtho da Cuthmanoye calan Armınoye bu zabno du qrobo qamoyo dbritho.

Bi maqırhonutho dhuwle u malolo du Qusro Heworo d’Amerika l’dafo Armınoyto mırle; Klozım dmawdena cali ulsoyutho dkıtle u makthabzabno xıd iqoro li sbutho du qtolğenso dan Armınoye. Xıd mraşho la guboye di rişonutho du athro, Biden mathkarwole a 1.5 da gabre, neşe u tloye dqtiliwo ba eşne haroye di mamlaxtho da Cuthmanoye. U rişono Amerikoyo mawdacwole’ste, dlıklozım dtocina u loste dfayşina b’şetqo cali kampanya barbroyto dsimowa bu zabnawo.

Bi maqırhonutho dhuwle u Qusro Heworo mırle’ste; Ahna gıdmdawmina dımyaqrina u mrodo dhuwle u camo Armınoyo mqabıl du gunhano u barbroyo wi şultonutho d’ucdo, masırto’yo bu şeçocayda lu iqoro da zedqe noşoye u dım’akdo, dnaqla hreto dlo mikarıri a hawbani. İ ulsoyutho dani kulle-mawdyonutho bu makthabzabno’yo. Bi egartho dımşadarwole u senator Bob Menedez l’Joe Biden mırlwole;

‘Kthuwlan i egarthathe, leşan dtulbina menayxu d’ruşmoyith dmawdetu bi şrorutho du qtolğenso dan Armınoye. Bu dacbar mawdewolox da hawbano-qtolğenso’we ubu mamlo dsımwolox ba 2020 bu zabno di kampanya dsımwolox bu duxrono du qtolğensano, mıctarafwolox ebe u mathkarwolox a dıbhayde. Calathe ucdo kıtulbina menox-hat xıd rişono d’Amerika, dmahtıt klayto qrıhto udi şultonutho dmawdıyo bu qtolğensano’. Bi egarthathe’ste mahkewole Menendez bşıkıl rwiho calu qtolğenso sistematik dsımwola i mamlaxtho da Cuthmanoye calu camo Armınoyo.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…