10/04/2021

U rişono di karxutho d’Los Angeles tlıble mu rişono Joe Biden dmawde bu qtolğenso da 1915

Bıthır mi sfaryawmo d’Los Angeles Times, ucdoste u rişono di karxutho d’Los Angeles Erik Garsetti, tlıble mu rişono Amerikoyo Joe Biden dmawde bu qtolğenso dan 1915.

Camatheste i sictho da hawrone d’Armenia bi kongre d’Amerika mabdela kampanya da imdat bu mawtbo tahtoyo di kongre, leşan i mawdyonutho bu qtolğenso dsim calan Armınoye.

U rişono di karxutho d’Los Angeles d’Amerika Eric Garcetti, mıştawtafle la qroyotho dıkmisomi lu rişono Joe Biden, leşan dmıctarıf bu yarhano d’Nison bu qtolğenso dsim calan Armınoye bu zabno du qrobo qamoyo dbritho. Bi egartho dhuwle du video dımşadır l’Biden, tlıble Garcetti mene dmawde bu qtolğensano dsımwola i malmlaxtho da Cuthmanoye calu camo Armınoyo ban 1915.

Eric Garcetti mırle; Ucdo’yo u zabno dmıjğolina i şrorutho. Ucdo’yo u zabno dmathkırina a gunhe wa trajediye du makthabzabno leşan naqla hreto dlo mikarıri. Ucdo’yo u zabno lkulayna-lu hawraydi Joe Biden, la mşale frişe d’Los Angeles, d’Amerika u gawonoyith dbritho kula dımhaydi u qolathe u camhıdode, dmawdena bu qtolğensano.

U videano dmıjğele Garcetti ebe, mtayıb bu taro di kampanya dmabdıyolın an Armınoye b’Amerika dmahıt eşma; E… qtolğenso’yo. Garcetti mırle’ste; Kımathkırina a milyone falge dan Armınoye dqtiliwo bışıkıl barbroyutho rabtho bi kampanya sistematik dsimo. Kull naqla gıdsundina u camo Armınoyo leşan dımhaqıq kinutho, mşaynutho u şlomo. Klozım dmathkırina i şrorutho du dacbar, leşan dqudrina dımhalxina lafu dactith.

Me gabo hreno i sictho da hawrone dan Armınoye bi kongre d’Amerika, mabdela kampanya da imdat bu mawtbo tahtoyo. Bi egarthathe’ste kmıtlıb mu rişono Biden dmıştawtıf cami kongre u ruşmoyith dmawde bu qtolğenso dan Armınoye udi mawdyonuthathe dmitawdıco bu mamlo dgısoyım 24 Nison, dkıtyo u yawmo dıkmitathır u şuroyo du qtolğensano.

İ maqırhonutho du inisyatif di kampanyathe’ste dıkmahkıyo bşıkıl rwiho calu qtolğenso dsim beyn 1915-1923 ,mid ma hadome di kongre; Adam Schiff, Gus Bilirakis, Frank Pallone Jr., David G. Valadao, Jackie Speier. Meqım yarho’ste mqadamwo lohitho d’38 senatore dtlıbwolın me Joe Biden dmawde bu qtolğenso dan 1915. Ba tebani dfrisi b’dafe dan Armınoye, camhıbol lo mathkır u Sayfo dsim calu camaydan ucala Yawnonoyeste.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…