U rişono gawonoyo d’QASAD Madhlum Cabde, frısle buyono bhaq du knuşyo dsim bayn du ENKS wu di PYD

SUROYA – Cabde bu buyonayde, makadle du knuşyano dawseyo lafi hdoyutho Kurdoyto bu maşıqlano ducdo d’Suriya. 

İ sictho di rişonutho du mawtbo athronoyo Kurdoyo d’Suriya ENKS u taşdarto mu gabo du huyodo demoqratoyo di PYD, hawilın athmıl knuşyo bi mditho di Hasake, dmıştawtaflele u rişono gawonoyo da haylawotho d’Suriya demoqratoyto d’QASAD Madhlum Cabde wu mathlono dilonoyo d’Amerika bu garbay madınho d’Suriya Skot Bolz u mathlone mu koalisyon emwothoyo. 

U knuşyano dımdawamle hedor d’arbac şoce, şafıc bı muzoğo msimono, u drişo ebe i hzayto folitiqoyto mşawtafto da kurdoye b’Suriya. Bebzabno, a’tre gabe matın l’awyutho dımhalqi a’dawsat dfayişi laşan dmıdmte l’qyomo haroyo baynothaye. Uba yawme dıbqamuthayna gıdfırsi mawdconutho bhaq du qyomo dgıdhowe bayn d’ENKS wi PYD. 

Camgabıdathe, u rişono gawonoyo d’QASAD Madhlum Cabde bu buyono dıfrısle athmıl bi dafayde d’X, mawdacle da tre gabe PYD u ENKS hawilın knuşyo camıhdode, laşan dımbayni xarita mşawtafto du darbo, udmihayıd u guşmo Kurdoyo bu maşıqlano ducdo. 

Cabde mathkarle ste di klayto wi hzayto da tre tarafe mede mafsıhonoyo, u makadlın dkıtyo i dawse qadmoyto bi şişaltho da knuşyo dgıdmitaybi laşan dmişarrıro i hdoyutho Kurdoyto. 

Bebzabno, Cabde mawdacle du knuşyano athi luhwoyo bnişo dmişatıs athro demoqratoyo mgawno b’gawıd d’Suriya dıksoyım u garanti da zedqe da camayda kulle, u makadle ste da tre gabe b’sebyono kamilone dmakışri u diyalogano dbaynothaye.