U rişono Zawgoyo d’ESU Fehmi Vergili mawdacle i tahraztathe da fulhone dcalu Sayfo

U rişono zawgoyo du Huyodo Suroyo d’Urifi Fehmi Vergili, mawdacle i tahraztathe da fulhone du Sayfo dgımisomi bu yarhano. U duxrono şatonoyo du Sayfo dan 1915 kmisım kull şato 15 bu yarhano d’Hziron.

 Bi tahrazto du Sayfo dsimowa b’Suroyo tv, Vergili mahkele calu tacbo wa hfitwotho dsimi dımamtelın i sbutho du Sayfo lı darğo dmıdroşo ba platforme dıbritho.

Bi tahraztathe dsimowa b’Suroyotv, u rişono zawgoyo d’ESU Fehmi Vergili mahkele cala fulhone  dsimi calu Sayfo, me halxe, kafne, kampanyat da imdat, turgome u konferanse uğer, hawyo i sbutho du Sayfo sbutho du camo kule. Bu mamleyde Vergili, kali cala fulhone mşawtıfe dıklozım dmisomi camıhdode bu zabnano, dıbritho kıfayto b’maşıqlo casqo.

U rişono zawgoyo d’ESU bu mamleyde kali cali ulsoyutho di kampanya da imdat dımabıdyolın bu darbo du nawlo u mahkele aydarbo kull ha kibe dmıştawtıf li kampanyathe. Vergili mahkeleste cal hın ma fulhonathe, dkıtlın talab mu cameydan uma şutosayde dıqudri dsaymilin camhıdode.

U talab qamoyo, u yawmo du duxrono du Sayfo dkıtyo 15 bu yarhano, kull farsufo mu cameydan dmaqıth şamco qum du baytayde yaste lawğıl. Renyo hıreno dkıtlın la gabe, şutose u citotho du cameydan, dsaymi luho du Sayfo u dımcalqila calu şuro, qum du tarco yaste lawğıl du şutoso.

Camgabe di tahraztathe mawdacle dhınne xıd ESU, kıthuwlın egartho dgımşadrila l’Amerika, l’Rusya, l’Emwotho Mhaydotho, lu Huyodo d’Urifi ulı athrawotho hrene dıktulbi eba, dmawdın bu Sayfo u dmitahwın a zedqe du camo Suryoyo Othuroyo-Kaldoyo-Oromoyo.

Bu huthomo di tahrazto u rişono zawgoyo d’ESU Fahmi Vergili tlıble mu cameydan kule, dmahwe awyutho la fulhone du Sayfo u bebzabno tlıble dkull farsufo mu cameydan, dsoyım u mede dgıqodır leşan dmathnıh a garme da sohde du cameydan du Sayfo, dlatyo idico a garmani haykone kulle.