U rişqutno d’Mısır Alsisi sımle qroyto dmitabde maşıqlo folitiqoyo kamilo dıkhobış b’gawe a’Suriye kulle dlo dyoşo dayna tarf dkito bu athro

KAHIRA – Calu şuwolo dqay a’Kurdoye lımıştawtaflın bi sictho mtaybonitho du nomuso esonoyo hatho d’Suriya, u malolo du notarrozo gawonoyo d’Emwotho Mhaydotho Stefan Dujarik makadle dıklozım a’came umthoye u tawdithoye kulle d’Suriya dmıştawtıfi lu maşıqlo folitiqoyo hatho. 

Dujarik dıgrışle u zuhoro cal Emwotho Mhaydotho dlımıştawtafla bu şekolo di sictho mtaybonitho du nomuso esonoyo d’Suriya, mawdacle ste d’Emwotho Mhaydotho kmıtyaqno dıklozım a’came umthoye u tawdithoye kulle dmıştawtıfi lu maşıqlano, bnişo dmisım u garanti dhowe b’kinutho mathlonutho la came kulle du athro. 

I maqırhonuthathe dı Dujarik athyo luhwoyo bu knuşyo dsımle la gelyunore b’Newyork, cali sbutho di sictho mtaybonitho du nomuso esonoyo hatho, udu lumodo du diyalog athronoyo d’Suriya. 

Mxasra hreto, u rişqutno d’Mısır Cabdılfattah Alsisi laqi athmıl u rişono du maşıqlo folitiqoyo hatho d’Suriya Ahmad Alşarıc bu taro du knuşyo dsımle u Huyodo Caraboyo bi mditho d’Alqahira cali sbutho du bnoyo u hethotho d’Ğaza. 

Alsisi bi ytawtathe, sımle qroyto dmitabde maşıqlo folitiqoyo kamilo dıkhobış b’gawe a’Suriye kulle dlo dyoşo d’ayna taraf dkito bu athro. 

Bebzabno, Alsisi mawdacle d’Mısır ksındo i hdoyutho wi mşaynutho da n’arcotho d’Suriya, ukrıfdo kul şıkıl d’hçomo bceldboboyo acla. 

M’gabo hreno, Alşarıc mawdacle dkobıc dımşare b’sayfa hatho di ahonutho cama n’athrawotho Caraboye udilonoyith camu athro d’Mısır, u mathkarle ste dkobıc dfolıh cami şultonutho d’Alqahira laşan du yuthrono da tre athrawotho.