U rişwazire d’Australia Anthony Albanese udi Armenia Nikol Paşinyan, adşato’ste frıslen egartho u mhanelen u camaydan bi rişe d’şato d’Ha Nison

U rişwazire d’Armenia Nikol Paşinyan, frısle egartho bi dafayde d’X u mqadamle a tahınyothayde lu camaydan u Othuroyo dıkhoye b’britho u dilonoyith dıkhoye b’Armenia bu cedo d’Ha Nison. Bi egarthayde Paşinyan mırle; Me lebi kule kımhaneno an Othuroye kulle bi cohnutho di şato hathto d’Ha Nison. Kıtlan sabro du bıtlono du rbicano dhowe wasile di hubo udu şuşoto lu camo kule. Kıtolano da eşne dothın’ste dhowın eşne di mawthronutho du camo dqodır dımhafıd i mardutho u leşonayde bu athrathe-Armenia.

Camgabedathe u rişwazire d’Australia Anthony Albanese mşadarle egartho u mcayadle u camaydan dıkhoye bu athro bi rişe d’şato d’Akitu. Bi egarthathe Albanese mırle; Bı fsihutho rabtho komarno şato brıxto lkull ha dıkmcayıd adyawma Ha Nison. U camo Othuroyo b’Australia kıtle darbo ğalabe şafiro dıkmasır u dacbarayde bu zabno d’ucdo. Kıtxu taşcitho catırto u flığxu i yortutho dxlıqxu lbritho kula-walaw şaficitu b’casqotho rabtho bıgawe du makthabzabno.

Albanese dmahkele cala hfitwothani dıksoyım u camaydan b’Ha Nison b’Australia mırle’ste; Xıd kull camo, hatu’ste kıkurxitu cal dactith towo u camhıdode, kiban dbonina u dactithano u camhıdode’ste kuthwina fosuqo hreno du makthabzabno d’Australia u dmaqwena u haylayda l’athro dkıtyo lkulayna. Latli keşlo, di rişe d’şatathe d’Ha Nison, gıdmhaydo u gıdmaqwıyo u camo Othuroyo b’Australia.

Camgabe du rişwazire d’Australia, ğer gabe u folitiqore du athro’ste mqadamlın a tahınyothathe lu camaydan. Bebzabno u camo yawmonoyo dıkhoye b’Australia, mıştawtafle adşato lu cadcido dsim bu macırbo d’Sidney. A Yawnoye’ste hadiri a zawhe dsimi, mahwelın raqde marduthoye mu qlimo du yamo Komo. Bıthır ma mamle dımqadım me mşale Yawnoye cala esore makthabzabnoye dkito beyn da 2 came, i gudo da Yawnoye mıştawtafla la raqde du camaydan uda gude du folklore dımqadmi bu yawmano.