U saqıbloyo rişoyo du rişqutno d’Turkiya-u rişono di karxutho d’Stanbul Ekrem İmamoğlu, msik adyawma bu cuqobo dsımle u polis calu baytayde

U rişkarxutho d’Stanbul b’Turkiya Ekrem İmamoğlu msik adyawma mu polis bıthır mıd sim cuqobo calu baytayde. İmamoğlu dıkmifaşıq u folitiqoro rişoyo dkıtyo saqıbloyo du rişqutno Turkoyo Erdoğan, bu normal gıdminaqe’wo cal qariwo mu gabayde di CHP xıd mraşho la guboye di rişqutnutho d’Turkiya dıkmıntır dmisomi ba 2028.

Lfuth i hzayto da mbahnone dcal Turkiya, idico’we dgıdothe yawmo dmımsık İmamoğlu-belhude cal dıkmşakıl qento l’Erdoğan. İmamoğlu dkıtyo cımre 53 eşne, mnaqe’wo rişono di karxutho d’Stanbul ba 2019 u heş mu zabnanwo, mifaşaqwo qento lu rişqutno. Wu adyawma msik ma thome qaşye du fassad umu snodo di PKK.

Elo İmamoğlu, kırofıd a thomani kulle u m’akadle, dlatle niye dmaslım ruhe la hbosani u mırle; U camo Turkoyo gıdobe funoyo la duglani dıknufqi ulu komplo dsim acle. Bebzabno, adyawma makle’ste mınyono celoyo d’plattforme du nawlo. U gabo di CHP udu gabo d’DEM’ste, bqaşyutho krıhlın u msokano d’İmamoğlu u mawdıc; d’komplo mqabıl di demoqratoyutho’yo.

Camgabe d’Ekrem İmamoğlu, kito’ste u mşaronayde Murat Öngun ubebzabno u bethdino frısle amro du msoko dhol mo farsufe hrene me thome frişe; beyn dani’ste, a thome di asirutho dcama hayle Kurdoye di PKK. A msokani hawın b’zabno şahino bi siyase d’Turkiya. U gabo d’Erdoğan AKP hzewole husrone rabe ba guboye qlimnoye wu camo fayış kıtolıb dmişahlıf u rişqutno.