U Sin mawdacle u ğamo dıktocın cali mlahmonutho da hayle da Uğur, bu gayso ruşmoyo d’Suriy

BEIJING – Ba zabne haroyani, mahwe hfuxye me mşale d’gabe u şutose-hem du camaydan, u garbay madınho d’Suriya u hem’ste mşale hrene, cali sbutho da hayle da Uğur dkıtne b’Suriya u dıkmibıc dmitacbıri lu gayso d’Suriya. Bi sbuthathe’ste u rişizgado du Sin bu Mawtbo di Mşaynutho d’Emwotho Mhaydotho Geng Shuang mawdacle i klaytathe cali mlahmutho da haylani bu gayso ruşmoyo d’Suriya u grışle u zuhoro calu qento di mşaynutho du athro.

Bu mamlo dsımle bu knuşyo dsim b’New York, Geng m’akadle u ğamo dıktucni cala tebani dfrisi u dhınne xıd athro, saqıbloye’ne lu tecbiro da haylani da Uğur bu gasyo d’Suriya. Calathe u rişizgado Sinoyo, mawdacle dgımasri esore cam Darımsuq bi sbuthathe u gıdtulbi mena, dmaklıyo u ğrobano u marhıbono u dımdawmo i mşalutho dkıtla bu ağono mqabıl di marhıbonutho.

Geng bu mamlayde b’Emwotho Mhaydotho mırle; Klozım dmimodi a tedbire kulle dıkluzmi, leşan dhowe duyoqo kamilo calu ğrobano u marhıbono uğer farsufe u ğrobe dkıtne bi lohitho du Mawtbo di Mşaynutho d’Emwotho Mhaydotho; xıdu Zawco Maşılmono du madınho d’Turkestan b’Suriya. U Zawcano, mşakalwo ma Uğur dıkhoyın bu garbay macırbo du Sin u Amerika maqımwola ba 2020, u ğrobano mi lohithayda di marhıbonutho.

Yawme d’Tre dşaficina u mathlono Amerikoyo b’Suriya Thomas Barrack mawdacwole, dhawiwo fhomo cam Darımsuq bi sbutho di mlahmonutho da hayle nuxroye bu gayso d’Suriya. Bu planano, kıhobış hol 3.500 hayle nuxroye-wi sagiyoyuthathe’ste Uğur’ne dkıtne mu Sin uma athrawotho şbobe. Bi sbuthathe’ste i dafo d’Rudaw grışla u zuhoro calu mamlo du rişono zawgoyo du gabo du Huyodo Suryoyo-Sanharib Barsoum dmırwole; dlo natiri hawxa fusqono di mlahmonutho da haylani bu gasyo d’Suriya dıkminase dmitarkıw bşıkıl professionell, masro ba qonune u rahuqo me tathire ideolojik.