U tboco foroso d’Turkiya mahkele cali dayro d’Mor Gabriel

Hıdo ma dafe du nawlo d’Turkiya maşmacla la qaroyeyda i taşcitho di dayro d’Mor Gabriel dkıtyo hıdo ma dayre catiqe du camo Suryoyo.

 Me gabo hreno u waziro du bınyono tahtoyo u du mutoyo d’Turkiya Adil Karaismailoğlu sımle socurutho li dayo d’Kurkmo u yatu camu metrofolito Mor Filiksinos Saliba Özmen.

Bi kthawto di mimartho  yarıxto dı kıthiwo cali taşcitho di dayro d’Mor Gabriel kmitahke aydarbo macımro u bebzabno dhawyowa i duktho da comure di dayroye u dayroyotho.

Bi mimarthathe kmitahkeste di dayrathe dkıtyo mşamahto ba bınyoneyda qulnaqa grışla u zuhoro da şalitone u da şıltınwotho dıhkımlın cal Turkiya.

Kmitawmır i dayro kıtla bınyone dkıtne dukothe di slutho i kubtho rabtho wi cito d’Yoldathaloho u bebzabno a bethqadişe da socure kothın me kul dukotho dmaydi burkotho mane.

U kathowo bi mimartheyde kmahke calu bınyono catiqo da betharke dkıtwola i dayro d’Mor Gabriel u bebzabno dkıtyo madraşto du yulfono dkito eba yolufe me Turcabdin u hata me dukotho mşahılfe dıgyılfi u leşono Suryoyo wa slawotho di cito.

Megabo hreno i dayro hreto dkıtyo mşamahto b’Turcabdin sim ela socurutho mu waziro du bınyono tahtoyo u du mutoyo d’Turkiya ba yawmotho d’şaficina.

U waziro Adil Karaismailoğlu bıthır mıd karıx a bınyone di dayro d’Kurkmo du Zacfaran laqi u metrofolito d’Omid u d’Merde Mor Filiksinos Saliba Özmen u mıdle mawdconutho mene cali dayro u cali aykanoyuthathe.