08/04/2021

U tboco froso emwothoyo grışle u zuhoro calu fusqono du msoko du dayroyo Aho Bilecen

Me gabo hreno, u fusqonano du bethdino d’Turkiya, mıdle duktho b’dafe frişe du tboco froso Emwothoyo u griş u zuhoro calu qedomo qaşyo dkıtla Ankara la bnaymothoyayda dilonoyith la Mşihoye du athro.

 Ba tebe dfrıslın a dafani du nawlo, mawdıc’ste du camaydan heş mu şuroyo du doro da 20, mıdwo nişo l’qtolğenso mi mamlaxtho da Cuthmanoye-dkıtne an abohe da Turkoye d’adyawma.

 Bi tahrazto dsimo wa athmıl casriye bhaq di sbuthathe du hbuşyo dhiw lu Dayroyo u camo Suryoyo krıhle u fusqanano dhuıle u bethdino d’Merde bhaq du dayroyo Aho Bılecen. Bu mamlo dsımlın a dayfe di Tharzto u mthlono du riksförbund d’Syrianska Samo Comari mırle hatno fusqono siyasiyo mqabıl du cameydan u latyo inaqa qamayto d’Turkiya ksaymi biotho mqabıl du cameydan mawxa klozım ahna ste mihaydina mqabıl d hcomani dkowın acleyna u torina mi qale da ışmone dlulan mede hani ba ışne.

U rişono zawgoyo d’ESU Fehmi Vergili mırle ahna mıqq dqowina a bcelıdbobeydan sıttır gıdhıcmi acleyna u mıqa dhıne hıcmi ahna qwina sıttır, tro kulnoşe dodıc ahna lık zaycina ma hcomani metul du cameydan lo fayış u camawo dkibin saymi kule mede dkıbci mqabıl dithe. Ba mamle dsımle a dayfe dmıştatwtaflın bu telefon camgabe dsımlın qrayto li hdoyutho du cameydan krıhlın u qedomo d’Turkiya.

Gabriyel Yalgın me Göteborg mahatle u fawdano kule calu rişqutno Erdoğan dhiyeyo bıthre du medano dkowe mqabıl du cameydan, u mırle a kurdoye kcıbri lkul cemıc u ksaymi esore cam folhe u cama malwin d’Turkiya lı ksaymi mede mqabıl dıthe elo abuna u dayroyo dhule koso dmaye u lahmeo lnoşe dlı kodıc mane gıdmihkim lu hbuşyo hano layban maqıblinale.

Ba casrowat d’dafe frişe du nawlo; beynothaye AsiaNews, Aval, u Qentrun d’Stockholm leşan i Hirutho, Sojournes uğer dafe semoloye d’Turkiya-xıdTurkish Minute, Mezopotamya News Agansi uğer, frıslın u tebo du çaza du hbuşyo dhiw athmıl bu bethdino d’Mırde, lu dayroyo di dayro d’Mor Yahkub d’Qarno du turo d’İzlo Abuna Sefer Aho Bileçen.

Wu Huyodo Suroyo d’Urifi-ESU mşadarle egartho la rişayizgade du Huyodo d’Urifi u d’Amerika dkıtne b’Turkiya calu çazzano dhiw lu dayro u tlıblın menaye dımdaxli bi sbutho. Camani’ste ğer şutose, tukose, folitiqore wu farsufe şarye du camaydan frıslın a hfuxyathe ba dafe kenşoye u krıhlın u qedomano d’Ankara lu dayroyo di cito Suryoyto Orthodoksoyto.

Camgabe dmahke cali celtho du fusqonano du bethdino, griş u zuhoro cala msoke, cala buqore u thome dımqadmi lu dayroyo u dımdace dıksonıd tukoso marhıbono. Elo u dayroyo’ste kull naqla rfıdle a thomani u m’akadle du camlayde masroyo bi tawdithayde u laybe dmadcır noşo kafino mu tarco di dayrayde.

Bebzabno mawdıc, di dayro d’Mor Yahkub d’Qarne kıfayşo b’duktho bu tayman madınho d’Turkiya dkıtyo ucdo i sagiyoyutho da comurayda Kurdoye wi dukthathe hani ba casrowat d’eşne-wahdo du qrobo beyn du gerilla di PKK uda hayle Turkoye. A Suryoye’ste, ha ma ğrobe rişoye dmafıtwo mu qtolğenso dsımwola i mamlaxtho da Cuthmanoye cala Mşihoye du athro meqım 100 eşne.

Ğalabe athrawotho u tukose Emwothoye’ste mawdelın da hawbani dsimiwo ban 1915 dkıtwın qtolğenso. Elo camathe’ste u camano heş holu adyawma kmitafıt ba rdufye ubu cnufyo d’Turkiya u jbiri li golutho. Lfuth a dafani, calu qedomano u qaşyo d’Turkiya mqabıl da Suryoye xıd aydarbo hawi ucdo’ste mqabıl du dayroyo, naqıs u mınyono da Suryoye b’Turkiya lhedor 25 alfo.

Check Also

Adam Schiff tlıble me Biden dmawde bu qtolğenso da 1915

B’egartho ftıhto dımşadarle u hadomo di kongre d’Amerika dkıtyo mu gabo da Demoqratoye mi …