U tukoso Britanoyo mzaharle dkito nacime dıkmeythi mu kafno b’Lebnon

Zıd m’550 alfo nacime kcayşi bu qento du kafno bu athro d’Lebnon.

U tukoso Britanoyo şaryo dışme “maxlesu anacime”, mawdacle dıkmıntır dmıhze nacime dıkmaythi mu kafno meqım mi harayto di şatathe b’Lebnon.

U tukoso dışme Save The Children awkith “maxlesu anacime”, mzaharle dkito hedor malyun d’farsufe bi fnitho d’Bayrut dlatlın azuze makfiyone dşıqli u muklathe, baynothaye zıd mu falgathe nacimene dıkmihadıdi bu kafno mfothıd du kriz momunoyo qaşyo dıkşofıc ebe u athro d’Lebnon.

U tukoso Britanoyo şaryo dlatyo masro cam şultonutho, bu taşroro dıfrısle mawdacle dkito bi fnitho rabtho d’Bayrut, 910 alfo farsufe, baynothaye 564 alfo nacime latlın zuze dıkmakfın lu şqolo da sniqwotho asasi di ciyeşathe.

U mdabrono du tukoso d’maxlesu anacime u ferco d’Bayrut Jad Saqır, bi maqırhonutho dhule lu tboco froso mırle “gdımşarina dhozina nacime dıkmaythi mu kafno b’Lebnon meqım mi harayto di şatathe. U kriz momunoyo kmohe kulle, ayaqrotho Lebnonoye wa galwoye Fleştoye u Suriye”.

Lfuth u taşroro d’Save The Children, u shofo du momuno d’Lebnon trele zıd m’falgıd malyun d’nacime bi fnitho d’Bayrut dobın mrodo laşan ahaye awste mqabıl du kafno. Wa yaqrotho da nacimani laybın dımamni asniqwotho asasi da haye xıd muklo, maye, kahrobo, nafto u hulmono.

U kriz momunoyo d’Lebnon ducdo kmıhşu u kriz momunoyo qaşyo dkulle dımhele Lebnon bu makthabzabnayde u hatho, dilonoyith bıthır mıdımvayacla i Lira Lebnonoyto 80% mu timo dkıtla mqabıl du Dolar. U bi netije du shofo di Lira, u camo Lebnonoyo lıfayışle amkone momunoye d’şoqıl asniqwothayde di ciyeşe yawmonoyto.

Lebnon ksoyım baytoyutho l’hedor malyun u 500 alfo galwoye Suriye, baynothaye hedor d’malyun mqaydene ruşmoyith b’Emwotho Mhaydotho.

Bebzabno, i şultonutho d’Lebnon kmıtyaqno dkito zıd m’174 alfo galwoye Fleştoye b’gawıd du athro, elo lfuth istatistike lo ruşmoye, u menyonaththe kmote l’500 alfo galwoye Fleştoye b’Lebnon.