U Tukoso d’Emwotho Mhaydotho sımle buhono cali aykanoyutho du muzoğo dı britho

Tukoso d’Emwotho Mhaydotho sımle buhono cali aykanoyutho du muzoğo dbritho u lfuth i netiçe da buhonani, ba 50 eşne haryoyan zayidi a gunhe du kyono hamış naqlat calu zabno d’meqım.

Me gabo hreno, u tbocofroso Emwothoyo grışle u zuhoro cala tawfone ucala arğalyotho dhawın ba yawme haroyani b’mdinotho u athrawotho frişe dbritho.

U ğaz msamımono da radoyotho uda macımle, u qşoco da cobe, u mawto da dawme, u fşoro da glide, b’dukotho i naşifutho u b’dukotho’ste a tawfone wa calcole dkowın, remze dıkxulqi ğamo rabo cali aykanoyutho di brithaydan’ne. U tukoso Emwothoyo dıkhoyır calu muğozo ucalu kyono d’britho World Meteorological Organization, frısle i netiçe da buhone haroye dsımle.

Bu taşrorano dfris athmıl, u tukoso d’Emwotho Mhaydotho m’akadle, di hawa harıwto zayido 5 naqlat zıttır ucdo lfuth meqım 50 eşne. U mşalo du tukosano Petteri Taalas dkıtyo u qentrunayde b’Geneve mawdacle, du mınyono da bnaynoşo dıkmaythi ma gedşani du kyono naqisi ışmo.

Gawonoyith b’britho, ba 50 eşne haroyani-hawi taqriban kull yawmo gunho du kyono dqtil ebeye ba mowat dıbnaynoşo u dhuwlın 202 milyone dolare husrono u yawmo. İ mşalonitho d’tukoso hreno du hulmono Mami Mizutori mfaşaqla i netiçathe ğalabe maziconitho wa gedşe dıkcayşi a came kıxulqi ğamo rabo. Camathe’ste ışqad kıtwo 31 milyone dıbnaynoş galwoye mcal fothe da gedşe du kyono.

Bi sbuthathe, mbahıs ucdo cali aykanoyutho d’New York d’Amerika dhawi tawfono rabo eba mcal fothe du calcolo d’İda wi mdabronutho di mdito, qrela l’aykanoyutho şnızto. Camgabe d’Amerika, Spania, Catalonia, u Hınd u Swed uğer athrawotho frişe dbritho, kıfayti bu zabnano b’maşıqlo d’tawfone uda arğalyotho dhawın b’mdinotho frişe u huwlın husrono rabo la bote da mdinoye.