25/04/2021

U Tukoso Emwothoyo; Lu Sutoro da Mşihoye mhanele Joe Biden dmawdele bu qtolğenso da 1915

U Tukoso Emwothoyo; Lu Sutoro da Mşihoye, mhanele u rişono Amerikoyo Joe Biden dmawdele bu qtolğenso dsımwola i mamlaxtho Cuthmanoyto calu camo Armınoyo.

Elo bu tebano, İDC kımamte’ste lu bolo u qtolğenso barbroyo dsim bcayni eşne calu camaydan u Suryoyo Othuroyo Kaldoyo Oromoyo ucalu camo Yawonoyo.

U Tukoso In Defense of Christians (IDC) dkıtyo u qentrunayde b’Woşington d’Amerika, mqadamle a tahınyothayde lu rişono du athro bıthır mıd mawdele athmıl bu qtolğenso dan Armınoye u hawi bu şıkılano, u rişono Amerikoyo qamoyo dıkmawde ruşmoyith ebe.

U tebano dfrısle İDC, frışle dilonoyith calu Sayfo dsim calu camaydan’ste u mırle; Ahna xıd tukoso dıkcaqıb i aykanoyutho da Mşihoye uda qalilotho tawdithoye bu Madınho Mescoyo ubı Afriqya, kımhana Biden cali mawdyonuthayde bu qtolğenso dan Armınoye mi mamlaxtho da Cuthmanoye bu zabno du qrobo qamoyo dbritho.

İDC mırle; İ mawdyonuthathe i makthabzabnoyto d’Amerika, dawse qamaytoyo lu dmicadıl’ste fawdo hreno du makthabzabno wi lo kinutho dsımlın a Cuthmanoye mqabıl da Mşihoye kulle. Lo tocina, camgabe dan Armınoye qtılwo’ste hol 1.9 milyone d’Yawnoye, Suryoye Othuroye Kaldoye Oromoye u acmaye Marounoye mcal fothe di tawdithathe i Mşihoyto.

U tukoso mırle; Calathe klozım i şultonutho Amerikoyto dmawdıyo’ste calu tathir qaşyo dtrele u qtolğensano cala came Mşihoye kulle. Kımhanena a senatore Bob Menendez, John Cornyn, Adam Schiff, Gus Bilirakis wa hrene kulle calu jahıd dmahwelın leşan i mawdyonutho bu qtolğensano.

Bu huthomo In Defense of Christians mırle; Kıtlan sabro rabo dfulhina bu dactith cami şultonutho du rişono Amerikoyo Joe Biden, leşan zıttır dmıgrış u zuhoro cala rdufye dıkmisomi me Turkiya hatta ucdo’ste, cala Mşihoye sohude u nubğe du qtolğensano dan 1915.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…