04/02/2025

U waziro di kinutho du Ciraq makadle li fatıryarxo Mor Gewargis III dikmimodi tedbire lu sutoro da mulkone dilonoye da Mşihoye

I wazirutho di kinutho du Ciraq mawdacla dmıdla a’tedbire kulle dıklızmi laşan dmisım u sutoro da mulkone da Mşihoye. I wazirutho di kinutho Ciraqoyto hula ste amro la şutose di şultonutho, dsaymi bkul şıkıl dı fşitutho a’warqe du qadastro da Mşihoye.

BOĞDOD, Ciraq – I wazirutho di kinutho du Ciraq bu buyono dıfrısla athmıl, mawdacla du waziro di kinutho Xaled Şuwani mıstaqbele bu makıthbayde bı Boğdod, i qadişutho du fatıryarxo di cito Catıqto d’Madınho Mor Gewargis Tlithoyo Yunan. Bi ytawtathe, drişi a’tedbire dıkmimodi mi wazirutho laşan du sutoro da mulkone da Mşihoye Ciraqoye, udmisım u garanti da zedqaththe du qadastro. 

U waziro Şuwani makadle di waziruthayde mşatasla sicotho dilonoye, laşan dmimodi a’tedbire kulle dıklızmi lu sutoro da mulkone dilonoye da Mşihoye bu Ciraq, u mathkarle ste di wazirutho di kinutho ftıhla darbone fşite laşan dmisomi a’warqe du qadastro dilonoyith da Mşihoye dıkhoyın larwal du Ciraq. 

Şuwani grışle ste u zuhoro cali wazirutho di kinutho dhula menyono d’nuhore u fuqdone dıksaymi u garanti du sutoro da zedqe du qadastro da Mşihoye, u hathe ste bu taro da fulhone dıksaymolın i wazirutho bnişo dmınfıq moro la mulkone da Mşihoye du Ciraq, udmitaqwe u garanti qonunoyo dkıtlın. 

Mxasra hreto, i qadişutho du fatıryarxo Mor Gewargis mqadamle tawdiyotho lu waziro di kinutho Xaled Şuwani, u mqalasle a’fulhone di waziruthayde dkımqadmo kul şıkıl dı fşitutho dıklızmo laşan dmisomi a’warqe du qadastro da Mşihoye.