U Xalij kmahwe u snodayde la guboye du Iraq

Anathrawotho Caraboye du Xalij, maglelın cali ulsoyutho da n’esoraththe camu Iraq, u makadlın ste di mşaynutho du athrano ulsoytoyo laşan du Xalij.

 İ klaytathe athyo luhwoyo bi ytawto dhawile u notarrozo gawonoyo du mawtbo di methcadronutho du Xalij camu waziro di baroyutho du Iraq.

U notarrozo gawonoyo du mawtbo di methcadronutho du Xalij Nayef Al(h)ajraf, bi socurutho dsımle adyawma li erişkoyto d’Boğdod, makadle i ulsoyutho dmişawşıti an’esore bayn du Xalij wu Iraq.

Alhajraf bu knuşyo mşawtfo dhawile camu waziro di baroyutho du Iraq Fuad Husayn, makadle di mşaynutho du Iraq wu şuşotayde ulsoyene li mşaynutho du Xalij udu qlimo kule. Bebzabno, Alhajraf grışle u zuhoro cali ulsoyutho da n’esore stratijikoye abyn du Iraq wu Xalij lfuth u buyono du knuşyo da 41 du mawtbo di methcadronutho du Xalij, u makadle ste dıklozım dmısnodo i mşaynutho wi morutho du Iraq, udmitaqwın a’fulhone di şultonutho d’Boğdod bu nfoqo mqabıl di marıhbonutho. Alhajraf mwasafleste u haylo di şultonutho du Iraq wa fulhone dıksaymolın, bnişo dmitarku u qonuno ba n’arcotho du athro kulle.

Megabo hreno, u waziro di baroyutho du Iraq Fuad Husayn bu mamlo dsımle grışle u zuhoro cali ulsoyutho di socurutho d’Alhajraf lu Iraq, u makadle ste i ulsoyutho dhowe sdirutho cama n’athrawotho du Xalij laşan i şalyutho du qlimo. Husayn bu mamlayde mawdacle dıdrışle bi ytawtayde cam Alhajraf i sbutho di marıhbonutho wu nfoqo mqabıl du tukoso marıhbono dı Dacış.

İ socuruthathe d’Alhajraf lu Iraq kmıhzoyo ulsoyto bi netije da n’esore mwatye dkito bayn da n’athrawotho Caraboye du Xalij wu İran dkıtle tathir u haylo rabo bu athro du Iraq.