U Yawnan mabdele kampanya mqabıl du fusqono d’Ayasofya

U Yawnan mabdele kampanya leşan snodo Emwothoyo mqabıl du fusqono dmıdla Turkiya dımşahlıfo i cito d’Ayasofya l’masığdo.

 Bi maqırhonutho dıfrısle u waziro di baroyutho du Yawnan grışle u zuhoro cala eşne dımdabrowa i mamlaxtho da Cuthmanoye u qlimo, wa rdufye wu qtolğenso dsımwola cala Yawnoye, Suryoye-Othuroye u Armınoye bu zabno du qrobo qamoyo dıbritho.

U fusqono dmıdla Ankara dımşahlıfo u remzo makthabzbabnoyo d’Ayasofya l’masığdo, xlıqle hfuxye Emwothoye, dilonoyith bu Yawnan. Calathe i şultonutho d’Athena mabdela kampanya leşan dmaydo snodo Emwothoyo bnişo dmitahıt tedbire casye cal Turkiya calu provokasyonano dsımla.

U waziro di baroyutho du Yawnan Nikos Dendias m’akadle, da folitiqore uda diplomatiqoye du athro kımtaybi gbino mhaydo mqabıl du fusqonano dmıdle u rişqutno Turkoyo uba kımo şabe dıbqamuthayna, gıdmitabde kampanya Emwothoyto. Dendias m’akadle u mırle; Qriho d’Erdoğan kobıc dmadcır u doro da Cuthmanoye u dhowe u huwe u şultono du qlimo kule udıdoyış a qonune wa prensibe Emwothoye kulle.

U waziro Yawnoyo mawdacle di cito d’Ayasofia dkıtyo 1.500 eşne catıqto wu kursiyo di Mşihoyutho heş meqım mıd a Cuthmanoye kbışwolın i mditho. U kboşanoste ha ma zabne catume du makthabzabnoyo da Yawonoyewe u mabdewo rdufye u qatle barbroye cala Mşihoye Yawnoye, Suryoye-Othuroye u Yawonoye u Ayasofia simowa bıthır masığdo.

İ mbahnonitho Yawnoyto dcala Byzantoye Helene Ahrweiler m’akadla u mırla; U makthabzabno, naqla hreto kmikarır ucdo. U fusqonano du rişqutno Turkoyo kımrayşın nfolo hreno di mamlaxtho da Byzantoye u dharbo hreto li tawditho Mşihoyuthoyo.