Surto: Greek Reporter
09/01/2023

U Yunan msikle 1300 qaçağçiye dıkmahızmiwo galwoye Suriye

Bi şato da 2022, u Yawnan msıkle hedor 1300 qaçağçiye dıkmahızmiwo galwoye mi xasra da thume dcam Turkiya. Lfuth i şultonutho du Yawnan, Turkiya ktılbo ma galwoye dkıtne ba n’arcothayda dıdıcri l’Suriya, yaste dşıfci la n’arcotho du Yawnan b’darbone lo qonunoye.

09/01/2023

ATINA – U athro du Yawnan kmıhşu laşan da galwoye, ha ma darbone rişoye du cboro la n’athrawotho du Macırbo d’Urifi. U waziro du sutoro mdinoyo bi şultonutho du Yawnan, Takis Thyodorikakos, mawdacle da noture du thumo msıklın bi şato da 2022, hedor 1300 qaçağçiye dıkmahızmi galwoye calu yurxo du nahro d’İvros dkımmathıl a’thume kyonoye cam Turkiya.

Thyodorikakos bi maqırhonutho dhule, mawdacle ste da noture du thumo, mnıclın bi şato da 2022 hedor 256 alfo galwoye dşıfci u nahro d’İvros dıkmitawmarle bu Turkoyo Meriç.

İ şultonutho d’Atina kımmo;

“Turkiya ktılbo ma galwoye dıdıcri l’Suriya aw l’ğer athrawotho, u yaste dşıfci la n’arcotho du Yawnan b’şıkıl dlatyo qonunoyo. Atina cılmıdıkmahto tedbire casye cala thume di naşfe udu yamo, elo naqla hreto hedor 18 alfo u 800 farsufe qadiri dşıfci la n’arcotho du Yawnan bi şato da 2022, mqabıl d’9 alfo u 157 farsufe dşafciwo bi şato da 2021, lfuth u komisyon da galwoye d’Emwotho Mhaydotho”.

Lfuth a’mşale Yawnoye, i şultonutho dı Turkiya di AKP udi MHP mawzadla u hboso cala galwoye laşan dnıfqi mu athro, xıd hıdriye di kampanya dıksaymola meqım ma guboye gawonoye dı Turkiya.