Ufrosqolo d’The Voice America krıhle ahjome dıkseymo Turkiya calu garbiyo du Iraq

A’Yezidoye di fnitho d’Şigur bu garbiyo du Iraq, kıtlın zuctho dhowın nişo l’rdufye hathe bi netije da hjome bcelıdbobe dıksaymolın Turkiya cal Şigur ucal fenyotho hrene bu garbiyo du Iraq.

Lfuth u tebo dıfris bu frosqolo The Voice of Amerika, a’Yezidoye kıtlın i zuctho dhowe b’rişaye xıdu mede dhawi la comure da fenyotho du garbiyo d’Suriya dıkbişi m’Turkiya.

U frosqolo The Voice of Amerika bu tebo dıfrısle lu tboco froso, mawdacle da n’abne di qalilutho tawdithoyto Yezidoyto, kzayci ma hjome oyaroye dkımdawmo Turkiya dsaymolın cali fnitho d’Şigur ucal fenyotho hrene bu garbiyo du Iraq bi dacwa du qrobo mqabıl da mharbone du gabo di PKK.

Bebzabno, The Voice of Amerika mawdacle da Yezidoye d’Şigur kıtlın zuctho dbıthır mıdhawınwo i şato da 2014 nişo la hjome marıhbone dı Dacış, dhowın i naqlathe nişo la hjome du gayso kaboşo dı Turkiya.

Camgabıdathe, u frosqolo d’Amerika grışle u zuhoro cali malfonitho di bethsawbo Amerikoyto d’Harward Emy Holmes dsımwola socurutho lu garbay madınho d’Suriya, udmıştawtafwola i şabtho dşaficina lu turgomo dımtayabwo bu darbo du vidyo konferans mi sictho Amerikoyto dcali hirutho tawdithoyto emwothoyto. Holmes bu mamlo dsımwola bu turgomano mırla “shifi a’bethıqbure da Yezidoye kulle dkıtne b’Şigur”.

Megabo hreno, u malolo bışmıd da Yezidoye d’Amerika Sacd Babar dkıtyo bebzabno mşalo bu tukoso d’Yazda, bi maqırhonutho dhule l’The Voice of Amerika, mawdacle da Yezidoye d’Şigur kıtlın i zuctho dhowe b’rişaye u mede dhawi bi mditho d’Cafrin uba fenyotho hrene dıkbışila Turkiya bu garbiyo d’Suriya.