Uhuyodo d’Urifi mazıdle imcadronutheyde lu Yawnan bi sbutho da galwoye

Anathrawotho hadome bu Huyodo d’Urifi, mazıdlın ucdo a noture cala thume leşan dımcadri u Yawnan, dmakle a galwoye dkothın me Turkiya.

 Leşan dmitaxıf u hbosano calu Yawnanste, u Huyodo d’Urifi mbayanle kmoyutho d’zuze luha dkobıc dnofıq ma maşıryotho udı docır lu athrayde.

U Yawnan, gıdqathle ucdo mcadronutho mu Huyodo d’Urifi leşan dsoyım hal u qetro da galwoye dkızzın me Turkiya. U Huyodo d’Urifi maqşele u duyoqo di mşaynutho da thume dkıtle u Yawnan cam Turkiya, leşan dımcadro i şultonutho d’Athena dımaklıyo a galwoye dkubci dızzın me Turkiya lu athro.

U Yawnan dmaqşele u duyoqo da thumayde dcam Turkiya, mahıtwoleste şorite du hadid, leşan a galwoye dlo cubri lu athro. Mawdıc leşan dmitaxıf u hbosano mcalu Yawnan, gdımqadım me Urifi hol 2 alfo euro lkull galwoyo dkobıc bu sebyonayde dnofıq ma maşıryotho dkıtne ba gzıryotho du Yawnan leşan docır lu athrayde.

İ daira di mşaynutho da thume-Frontex, mşadarle 100 noture hrene me Urifi lu athro du Yawnan. A folhani, sahmo ma 500 hayle dfırşile u Huyodo d’Urifi leşan u snodo du Yawnan, bıthır mıd Turkiya maklewola u duyoqo da thumayda dcama athrawotho d’Urifi.

İ sagiyoyutho da galwoye dkızzın me Turkiya lu Yawnan, kşufci calu thumo du nahro d’Evros dkıtyo thumo yarixo d’20 milat. A sfinotho bu yamo d’Ege’ste, gıdmitaklın me Turkiya. Lfuth u tukoso d’Osye dlo Thume, 14 alfo ma galwoyani nacimene u 7 athrawotho d’Urifi maqbelın dmıstaqbıli kull ha menaye 1.600 tloye.