Umbahnono Franşoyo mawdacle da Mşihoye du Iraq latne qalilto klozım dmiqadamlın xıd bnaymothoye Iraqoye

U mbahnono Franşoyo Luwis Dö Bembılyon, mawdacle da Mşihoye du Iraq latne qalilto elo klozım dmiqadamlın xıd bnaymothoye Iraqoye.

Bembılyon bu mamlo dsımle bu lumodo d’Arbil, mawdacle du qlimo d’Kurdistan duktho tawtoyo li mşaynutho da Mşihoye, elo laybe dhowe i tahrazto du şroyo du krizathe bu Iraq.

Bu yawmo trayono du lumodo dımtayıb bi mditho d’Arbil bu calway “u Iraq, şafro du trajidi”, u mbahnono Franşoyo Luwis Do Bembılyon sımle mamlo calu dactid da Mşihoye du Iraq, u mırle “a’qalilwotho kıtlın makthabzabno catiqo bu Iraq dilonoyith bi xasra du garbiyo. Wu tukoso marıhbono dı Dacış wa hçomayde trelın tathir cali aykanoyutho da Mşihoye du athro”.

Bembılyon mawdacle ste da Mşihoye latne qalilutho bu Iraq, elo klozım dmiqadamlın xıd barmothoye, u hawxa mdawamle “a’Mşihoye qadiri d’bonın geşro cama came umthoye hrene, ukıtlın makthabzabno mşawtfo acmaye bu Iraq”.

Cali sbutho di golutho da Mşihoye mi mditho d’Mawsal umi daşto d’Ninwe lu qlimo d’Kurdistan, u mbahnono Franşoyo mırle “u qlimo d’Kurdistan duktho tawtoyo la Mşihoye mi xasra di ciyeşe udi mşaynutho, elo laybe dhowe i tahrazto du şroyo du krizaththe bu Iraq. A’Mşihoye du athrano cayişi casqıwotho ğalabe, cal dımqadım elaye b’şıklat mşahılfe dlatne towe”.

M’gabo hreno, i mbahnonitho Julyet Valwa bu mamlo dsımla grışla u zuhoro cali aykanoyutho da Yezidoye d’Şigur, u mawdacla dhınne ste xda Mşihoye m’athri b’şıkıl rabo ma hçome marıhbone dı Dacış di şato da 2014. Valwa dmathkarla da Yezidoye wa Mşihoye hawınwo nişo l’hçome mtakse bıthır mi şato da 2003, mırlaste “Şigur hdo ma fenyotho yo dlatne safye, wi qale dkito cal fnithathe xlıqla kriz folitiqoyo dıkmamte camruhe qetre yawmonoye la comure d’Şigur. A’comure d’Şigur kıtlın mardutho catırto, wi fnithathe bu zabno d’Saddam Husayna cayşowa casqutho, cal hawyowa nişo dmişahılfowa i hiyoyuthayda l’hiyoyutho hreto Caraboyto, elo cıl mathe a’Yezidoye qadiri dımdawmi a’hayaththe”.