Umgabyo dı Bsorino kıthule maqırhonutho calu qetro du hboso du kahrıbo

Umgbayo di qritho d’Bsorino d’Turabdin Şamcun Guzel, kıthule egartho dı maqırhonutho calu qetro wu hboso dsımla i şirke du kahrobo du qlimo, cali qritho d’Bsorino.

 Bi egarthathe umgabyo komır; I sbuthathe bidactho u lo kinutho simo mqabıl di qritheydan, mawxa kımzahrina a qıryawotho hrene u ksaymina qrayto la mşale dımdaxli, leşan dlowe hawxa sebwotho hrene.

 I egarthathe du mgabyo kımşaryo ba melani: 2 bu yarhano, ba şoce d’safrayto a mşale di şirke du kahrobo cam mınyono rabo d’folhe Turkoye athın li qritheydan dılo şeyolo menayna u dılo xabro. Abici dımşahılfi a trafowat a muhawalat du kahrobo dkıtne 100 u 160 kilowat, u dmahti bdukthaye hın dkıtne 50 kilowat. İnaqla dımşayelan qay hawxa kmisım, lo dacırlan funoyo.

İ egartho du mgabyo kımdawmo ba melani; Ahna a comure di qritho d’Bsorino mu iqoro dkıtlan lu gayso du athreydan u la qonune, lo mahıtlan klayto u mbarbızina la boteydan. Ono u mgabyo notarwayno funoyo maqıncono ma mşale di şirke. Meqım 2 yawmeste inaqla dathın dımşahılfi u trafo, sımli telefon la rişone di şirke, elo lo huwlın funoyo.

I egartho kımmo; Ahna latna mqabıl du şuhlofo da trafowiye ahna kımmina qay layto qritho hreto bi hiğmonutho d’Şırnax? qay kul mede dkowe qulnaqla bi qrithaydan. I şırke du kahrobo ksaymo i qritheydan ale la teştcınye, qay ahna ema nafiqina mqabıl da mşale, dmamtelın ba casrowat d’folhe u noture bı radoyotho folhoye. İ şirkathe dkuxlo a zuze da faqire star mıd dkıbco dımcajızolan latyo mede hreno.

Umgabyo komır; I şırkathe meqım 5 eşneste cal ışme dıkmşahılfo i arcoyutho da qıryawotho d’Bethzabday u leşan dı qudri cubri la qıryawotho hrene, athın u mşahlaflın u sistem du kahrobo. Kımşaylina bıthır mıd mşahlaflın i arcoyutho tahtayto da qıryawotho Suryoye kımo qıryawotho hrene mşahlaflın. Qay qulnaqla ahnana u nişo. Hal ba qıryawotho dkıtne beyn 100 u hol 400 yaqrotho latlın kahrobo mvayco, ıla gabeyna belhude kıtlın.