Umqimdino Rişoyo kobıc dmitaqım u bethdino dhiw bhaq d’Sellahatin Demirtaş

Umqimdino rişoyo du bethdino celoyo d’Turkiya tlıble dmitaqım u bethdino dhiw bhaq du rişono du gabo demoqratoyo da came dmeqım Sellahtin Demirtaş cal dsımwole mamlo bu cedo du nawroz bi şato 2013.

Umqimdino komır u mamlo dsımwole Demirtaş fawdo fhim elo inaqa  dşomıc kule kforıq dlaybe bcelıboboyutho aw propaganda dilonoyto.

Sellahtin Demirtaş dkıtyo u rişono zawgoyo dmeqım du gabo demoqratoyo da came HDP u bebzano dımraşahwole ruhe li rişqutnutho du athro d’Turkiya u mıdwole u snodo d’ğalabe ma falqe du kenşo d’Turkiya ba mamle dsımwole bu zabno di mraşhutheyde.

Bıthır mu maşıqlano mahıtwo bu hbuşyo dı thımwo dsımwole mamle dkıtwene qento lu athro d’Turkiya awste dkıtweyne propaganda du gabo di PKK.

Demirtaş heş dkıtyo bu hbuşyo u dıkmıthım b’mamle dsımile ftiho baltome u ba knuşye dkıtweyne ftihe lu camo, ğalabe mfaşqone u folitiqore kımmi msikoyo siyasi laşan Erdoğan dı qodır manhıt i tahrazto dkıtle la haye, awkith latyo msiko lfuth a qonune wa zedqe noşoye.  Elo b’Turkiya dilonoyith bu zabno di şıltonutho d’Erdoğan kulmede kibe dhowe u man dısoyım mamlo mqabıl di şıltonutho d’Erdoğan kibe mitahıt bu hbuşyo dlo tımede.

Elo ucdo u mede dhawi umqimdino rişoyo du bethdino celoyo du athro tlıble dmitaqım u dino dhowe bıhaq d’Sellahatin Demirtaş dkıtwe 4 ışne u 8 yarhe dhuwo elo cal dsımwole mamlo bu yawmo du Nawros dı thim dkıtwe mamlo di Propoğanda u samwo qento lu athro.

Bi mawdconutho dhule umqimdino komır u mamlo d’Demirtaş dmisanıt kule inaqayo kmıfhım dılayt ebe Propopanda di PKK u d’Abdullah Öcalan.