UNESCO mabdele tarmitho dı hethoto şawtho catıqto d’Mawsal

U tukoso Emwothoyo di Yortutho-UNESCO, mabdele tarmitho du bnoyo u du hethotho di şawtho catıqto d’Mawsal.

 Megabo hreno kmitawdıc, di madraşto dilonoyto d’Şamcun Alsafa di cito Kaldoyto d’Bobel b’Mawsal, kluqyo ucdo qento du shofo du benyonayda u tahtoyo.

Bıthır mıd şafıc 3 eşne calu huroro d’Mawsal ma ğrobe marhıbone d’Dacış, heş i sagiyoyutho di mdito harıwtoyo u dilonoyith i şawtho catıqto di mdito heş shifothoyo u noşo laybe dcoyış eba mu zawlo, mu reho uma bınyone shife. Ucdo u tukoso Emwothoyo di Yortutho UNESCO mabdele tarmitho du hethotho di şawtho catıqto di mditathe dıkhoyewo eba meqım mınyono celoyo man abne du camaydan.

U mede dıkgorış u zuhoro cali tarmithathe d’UNESCO, du hethothani gıdmisım mşawtıfo ma Mşihoye uma Maşılmone’yo. İ tarmithathe’ste mahıt ışma; U hethotho di ruho d’Mawsal, mnaqe falohe me tawdiyotho frişe leşan dfulhi camhıdode lu bnoyo du masığdo catiqo d’al Nuri uda citotho catiqe du camaydan di Saca wi cito d’al Tahera. Me gabo hreno i madraşto dilonoyto d’Şamcun Alsafa di cito Kaldoyto d’Bobel dkıtyo b’Mawsal, bu qento du shofo du benyonayda u tahtoyo’yo.

İ madraşto d’Şamcun Alsafa fayişo xlitho dlo yolufe bıthır mıd kbişowa Mawsal ma marhıbone d’Dacış ba 2014. U mdabrono di madraşto Ahmed Thamer bi maqırhonutho dhule mawdacle di madraşto d’Şamcun Alsafa sımwo u hethothayda bıthır mu huroro d’Mawsal me hın tukose du kenşo mdinoyo, elo u benyonayda u tahtoyo mati ucdo l’qum shofo, mi celtho da maye da kanale wa maye hrene du matro dımharawlın u benyonayda.

Calathe, u mdabrono di madraşto tlıble mi fatıryarxutho di cito Kaldoyto dımsarhıbi bu snodo du hethotho di madraştathe dıkdocır u makthabzabno du şetosayda li şato dan 1855. İ madraşto d’Şamcun Alsafa mawfaqwola ba alfayo d’yolufe u yolufyotho dmıdwolın duktho bu kenşo du Iraq; beynothaye u tlithoytube mnohnafşo fatıryarxo Mor Rofayel Bedawid, u yadıcthono du makthabzabno qaşişo Bıtrıs Haddad wu fatıryarxo ducdo di cito Kaldoyto Mor Luis Rofayel Sako.