Uqrobo d’Nagorno Qarabax u dewam du qtolğenso dsımwo cala Armınoyeyo

U rişono di mtakasto emwothoyto di awyutho Mşihoyto John İpner, mawdacle du qrobo dhawi bu qlimo d’Nagorno Qarabax, dewam du qtolğenso dsımwo bhaq da n’Armınoye i şato da na’1915 yo.

 İpner bi maqırhonutho dhule lu tboco froso d’Amerika, mawdacle du qtolcamo d’Qarabax lımhele bi cayno d’noşo, mi celtho di qale dkito bayn da hayle rabe dı britho.

 Kito qtolcamo da Mşihoye Armınoye, elo u qtolcamano hul darğo rabo şafıc dlo haç d’noşo, mi celtho di qale dkito bayn da hayle tibeloye. A’melani du rişono di mtakasto emwothoyto di awyutho Mşihoyto d’John İpner ne, lfuth i maqırhonutho dhule li sferyawmo Amerikoyto Christian Post.

İpner komır “cıl mda noşo bu zyudaththe khayri lu qrobo bayn d’Armenya u Atherbejan xıd dkıtyo qrobo hreno tacyo dlatle mıcne b’falqo rahuqo dıbritho, elo du şroro u qrobano qtolğenso hreno la Mşihoye yo dıkdocır bu şerşayde l’zıd m’100 ışne mu makthabzabno. İ şroruthathe mkasyo bi netiçe di kampanya da dugle dsimo mi şultonutho d’Atherbejan. Armenya u Atherbejan b’qrobo ne cal falqo d’arco nacımto dışma Nagorno Qarabax. İ fnithathe lfuth u camo Armınoyo u athraththe u makthabzabnoyo. Kito darbone ğalabe mşahılfe laşan u tewdico di fnithathe. An’Armınoye kımmi i fnithathe falqo m’Armenya yo, elo latyo falqo ruşmoyo mu athro d’Armenya. Emwoyith Nagorno Qarabax kmitıctarıf eba xıd cafro d’Atherbejan yo, elo i sagiyutho da bnaynoşayda Armınoye ne, u kıtlın şultono yothoyo. Bıthır m’şeth şabe du qrobo, Rusya mıştacela dawro mescoyo bu qyomo du şlomo i şato dşaficina”.

İpner dkıtyo rişono dı tukoso Mşihoyo da zedqe noşoye mawdacle ste du qetro d’Qarabax latyo balhude qrobo gawoyo, elo u qetrano nafıq liholo xıd falqo mı maşıqlo makthabzabnoyo yarıxtır, w’ucdo athi luhwoyo cala da şartat jiyosiyasi gawoye şawyene, uba melani mdawamle “i şato da na’1915 i impratoriye Cuthmanoyto Maşılmonoyto qtiwola zıd m’malyun u falge Armınoye. U Turkiya hul ucdo lıkmıctarfo du gedşano qtolcamo we. An’Armınoye kulle Mşihoye ne, u Armenya u athro qamoyo dkulle we dımşataswole i Mşihoyutho xıd tawditho du athro. Atherbejan b’yawmo ma yawme qlimo masro we cami ipratoriye Cuthmanoyto. A’noşe lıkfıhmi da n’Atherbejanoye Turkoye ne, ukmıçğoli b’leczo Turkoyo. İ naqla dhowe mhilutho bu sutoro da n’Armınoye, wu sistem emwothoyo dımvayıc u balansayde, gıdmijarıb naqla hreto dmıtrodi an’Armınoye ma n’arcothaththe”.